រថយន្តធុនធំបុកម៉ូតូបណ្តាលឲ្យបុរសម្នាក់ស្លាប់នៅនឹងកន្លែងកើតហេតុ
ភ្នំពេញ ៖ កាលពីវេលាម៉ោង ១៨ និង ០០ នាទីយប់ថ្ងៃទី ២៩ ខែមករា បុរសម្នាក់បានស្លាប់បាត់បង់ជីវិតនៅនឹងកន្លែង កើតហេតុ ក្នុងខណៈ ជិះម៉ូតូ ហើយត្រូវរថយន្តធុនធំមួយគ្រឿង បើកបុកពេញទំហឹង នៅតាមបណ្តោយផ្លូវចំការដូង (២១៧) ក្នុងភូមិជើងឯក សង្កាត់ជើងឯក ខណ្ឌដង្កោ ។
បុរសម្នាក់ស្លាប់ក្នុងហេតុការណ៍នេះមានឈ្មោះ តែម សារឿន អាយុ ៤៦ ឆ្នាំ ស្នាក់នៅភូមិព្រែកតាឡៃ សង្កាត់ ព្រែកកំពឹស ខណ្ឌដង្កោ ជិះម៉ូតូមួយគ្រឿងម៉ាកសេ ១២៥ ពណ៌ខ្មៅ ពាក់ស្លាកលេខ កណ្តាល 1 B 1934 ក្នុងទិសដៅពី ជើងទៅត្បូង តាមបណ្តោយផ្លូវចំការដូង ខណៈជិះមកដល់ចំណុចកើតហេតុខាងលើនេះស្រាប់តែមានរថយន្តធុនធំមួយគ្រឿង ម៉ាក ហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ 3A 4859 ដែលកំពុងបើកបរក្នុងល្បឿនយ៉ាងលឿនក្នុងទិសដៅពី ត្បូងទៅជើងបញ្ច្រាសទិសគ្នាជាមួយម៉ូតូរបស់ជនរងគ្រោះ ពេលនោះរថយន្តបង្កហេតុបានព្យាយាមបើកវ៉ារថយន្តមួយគ្រឿងទៀត ក៏បណ្តាលឲ្យរថយន្តបង្កបានរេចង្កូតបុកម៉ូតូពេញទំហឹងបណ្តាលឲ្យបុរសម្នាក់ជាម្ចាស់ហោះផ្លោងបោក ក្បាលផ្ទប់និងក្បាលរថយន្តបង្កបែកក្បាលស្លាប់ភ្លាមៗនៅនឹងកន្លែង កើតហេតុ។
បន្ទាប់ពីកើតហេតុសាកសពបុរសរងគ្រោះត្រូវបានសមត្ថកិច្ចទំនាក់ទំនងទៅ ក្រុមគ្រួសារឲ្យមកទទួលយកទៅ ធ្វើបុណ្យតាមប្រពៃណី ។ ចំណែករថយន្តបង្ក និងម៉ូតូរបស់ជនរងគ្រោះត្រូវបានសមត្ថកិច្ចមូលដ្ឋានសហការជាមួយប៉ូលិស ជំនាញ ចុះមកវាស់វែងដកហូតយកទៅរក្សាទុកនៅការិយាល័យចរាចរណ៍ជើងគោករាជធានី ភ្នំពេញដើម្បីដោះស្រាយ តាមនីតិវិធីច្បាប់ ៕
ដោយ៖ ហេង នាង
