អ្នកបើកបររថយន្ដដឹកដីម្នាក់ស្លាប់ដោយកៀបជាប់ក្នុងរថយន្ដ
ភ្នំពេញ៖ កាលពីវេលាម៉ោង៣និង៣០នាទីរសៀលថ្ងៃ ទី២៨ ខែមករា ឆ្នាំ២០១៣ លើនៅដីវាលមួយន្លែងក្នុងភូមិបាយ៉ាប សង្កាត់ភ្នំពេញថ្មី ខណ្ឌសែនសុខ បុរសអ្នកបើកបររថយន្ដដឹកដីម្នាក់បានកៀបជាប់នៅក្នុងកាប៊ីនរថយន្ដ ស្លាប់ភ្លាមៗខណៈដែលកំពុងទយគូទរថយន្ដចាក់ដីហើយត្រូវបានរថយន្ដ ដឹកដីមួយគ្រឿងទៀតផុងដីក្រឡាប់ពីលើរថយន្ដបុរសរងគ្រោះ ។
តាមប្រភពព័ត៌មានបានឱ្យដឹង ថា បុរសដែលត្រូវរថយន្ដដឹកដីដូចគ្នាផុងដីក្រឡាប់សង្កត់លើនោះត្រូវ បានគេស្គាល់ឈ្មោះ ផល សុផាត អាយុ២៦ឆ្នាំ ជាអ្នក បើករថយន្ដដឹកដីស្នាក់នៅម្ដុំសង្កាត់ឃ្មួញ ខណ្ឌសែនសុខ មានស្រុកកំណើតនៅភូមិអង្គរជ័យឃុំមហាខ្ញូងស្រុកកោះសូទិន ខេត្ដកំពង់ចាម ។
តាមប្រភពព័ត៌មានបានបង្ហើបឱ្យដឹង ថា នៅមុនពេលកើតហេតុបុរសរងគ្រោះបានបើករថយន្ដដឹកដីមួយគ្រឿងពាក់ ស្លាកលេខភ្នំពេញ3A-0889ចូលទៅកន្លែង កើតហេតុខាងលើហើយក៏ទយគូទ ដើម្បី ចាក់ដី ស្រាប់តែពេលនោះមានរថយន្ដ ដឹកដីមួយគ្រឿងទៀត ពាក់ស្លាកលេខភ្នំ ពេញ3A-1593 បើកបរដោយយុវជនបានចូលមកចាក់ដីនៅក្បែរនោះដែរ ប៉ុន្ដែពេលកំពុងបើកស្រាប់តែផុងដីបណ្ដាលឱ្យរថយន្ដក្រឡាប់មក ខាងស្ដាំ លើរថយន្ដបុរសរងគ្រោះហើយសង្កត់កៀបជាប់ក្នុងកាប៊ីនបណ្ដាលឱ្យ ស្លាប់ភ្លាមៗ តែម្ដង ។
ក្រោយកើតហេតុនគរបាល ចរាចរខណ្ឌសែនសុខបានចុះទៅពិនិត្យនិងវាស់វែងរួចបានប្រគល់សពទៅ ឱ្យក្រុមគ្រួសារយកទៅធ្វើបុណ្យនៅឯស្រុកកំណើត ។ចំណែករថយន្ដ ទាំងពីរគ្រឿងត្រូវបាននគរបាលដឹកយកទៅរក្សាទុកនៅការិយាល័យ នគរបាលចរាចររាជធានីភ្នំពេញដើម្បីដោះស្រាយតាមច្បាប់ ៕
