បើកបររថយន្តជ្រុលទៅបុករះម៉ូតូកង់បី និងលំនៅឋានប្រជាពលរដ្ឋ
ភ្នំពេញ៖ កាលពីវេលាម៉ោង១និង០០នាទីរំលងអាធ្រាត្រឈានចូលថ្ងៃទី២៦ ខែមករា រថយន្តមួយគ្រឿងបើកទៅបុកម៉ូតូកង់បីដែលមានបុរសម្នាក់ដេកក្នុងនោះពេញទំហឹង បណ្តាលឲ្យបុរសនោះខ្ទាតចេញពីម៉ូតូកង់បី រងរបួសគ្រេចចង្កេះ ស្ថិតនៅមុខផ្ទះលេខ៨២ យីហោ ឪសថស្ថាន បន្ទាយស្រី តាមបណ្ដោយវិថីព្រះសីហនុ ក្នុងសង្កាត់បឹងកេងកងទី១ ខណ្ឌចំការមន។
ប្រភពព័ត៌មានបាន ឲ្យដឹងថា មុនពេលកើតហេតុគេឃើញរថយន្តមួយគ្រឿងម៉ាកកាមរីបាឡែន ពណ៌ទឹកប្រាក់ ពាក់ស្លាកលេខភ្នំពេញ2U1697បើកបរដោយបុរសម្នាក់មិនស្គាល់ អត្តសញ្ញាណនិងស្ត្រីពីរនាក់ ក្នុងល្បឿនលឿនដូចហោះតាមបណ្ដោយផ្លូវលេខ៥១ ទិសដៅពីជើងទៅត្បូង លុះពេលបើកមកដល់ចំណុចកែងនិងវិថីព្រះសីហនុ បម្រុងនឹងបត់ស្ដាំ តែដោយសារតែអ្នកបើកបរបួងចង្កូតរថយន្តមិនអស់ក៏ជ្រុលល្បឿនទៅបុក ម៉ូតូកង់ដែលចតស្ងៀម បណ្ដាលឲ្យខ្ទាតទៅបុកបង្គោលស្លាកយីហោ ចំណែកមនុស្សដែលដេកក្នុងម៉ូតូកង់បីបានខ្ទាតចេញមកក្រៅ រងរបួសគ្រេចចង្កេះ ហើយរថយន្តនៅមិនទាន់អស់ល្បឿនបានជ្រុលទៅបុកចូលលំនៅប្រជាពលរដ្ឋនៅ ក្បែរម៉ូតូកង់បីបណ្ដាលឲ្យបែកបាក់សសរទ្វារ ទើបរថយន្តអស់ល្បឿនទៅមុខលែងរួចឈប់នៅកន្លែងកើតហេតុតែម្ដង ចំណែកអ្នកបើកបរនិងអ្នករួមដំណើរពីរនាក់បានរងបួសស្រាល។
ក្រោយពេលកើតហេតុភាគីខាងរថយន្តបានចេញថ្លៃសងការខូចខាតទៅឲ្យ ម្ចាស់ម៉ូតូកង់បីនិងសសរទ្វារផ្ទះប្រជាពលរដ្ឋដែលរងការខូចខាត ដោយសាររថយន្តបង្កខាងលើបើកទៅបុកនោះ ដើម្បីបញ្ចប់រឿង៕
ដោយ៖ ហេង នាង
