មេក្លោងអាល់កៃដា បេលម៉ុកតារ ទំលាក់កំហុសសោកនាដកម្មនៅរោងចក្រប្រេង និងឧស្ម័ន In Amenas ទៅលើទាហានអាល់ហ្សេរី
នៅប្រទេសអាល់ហ្សេរីមេក្លោងអាល់កៃដា នៅម៉ាហ្ក្រេប មួយរូប ឈ្មោះ បេលម៉ុកតារ បានទំលាក់កំហុសសោកនាដកម្មដែលកើតឡើង នៅរោងចក្រប្រេង និងឧស្ម័ន In Amenas ទៅលើទាហានអាល់ហ្សេរី។ ក្នុងសេចក្តីថ្លែងការណ៍របស់ខ្លួន ផ្ញើទៅស្ថាប័នព័ត៌មានម៉ូរីតានី Nouakchoott កាលពីថ្ងៃអាទិត្យម្សិលមិញ បេលម៉ុកតារបានចោទទាហានអាល់ហ្សេរី ថា ឆាប់ប្រលូកខ្លួន ក្នុងសង្គ្រាម ដោយមិនសូវគិតគូរ ពីអាយុជីវិតរបស់ចំណាប់ខ្មាំង នៅពេលដែលផ្នែកឧទ្ទាម ព្យាយាមធ្វើការចរចា រកដំណោះស្រាយ។ សូមរំលឹកថា កាលពីល្ងាចថ្ងៃសៅរ៍ ប្រតិបត្តការរបស់កងកម្លាំងពិសេសអាល់ហ្សេរី ក្នុងការរំដោះចំណាប់ខ្មាំង ពីពួកឧទ្ទាម នៅរោងចក្រប្រេង និងឧស្ម័ន In Amenas បានធ្វើអោយបាត់បង់ជីវិត ចំណាប់ខ្មាំងជាតិអាល់ហ្សេរី និងបរទេស ២៣នាក់ និង ភេរវជន ៣២នាក់។
មេក្លោងអាល់កៃដា នៅម៉ាហ្ក្រេប ឈ្មោះ ម៉ុកតារ បេលម៉ុកតារ ដែលប្រកាសថា ខ្លួនជាអ្នកចាប់ជំរិតចំណាប់ខ្មាំង នៅរោងចក្រប្រេង និងឧស្ម័ន In Amenas ក្នុងប្រទេសអាល់ហ្សេរីបានចោទទាហានអាល់ហ្សេរីថា រាល់ដំណាក់កាលបង្ហូរឈាម ក្នុងសោកនាដកម្ម គឺបង្កឡើងដោយទាហានអាល់ហ្សេរី។
យោងតាមសេចក្តីថ្លែងការណ៍ របស់មេក្លោងអាល់កៃដា រូបនេះ ដំបូងឡើយ ពួកឧទ្ទាមបានព្យាយាមធ្វើការចរចា ជាមួយទាហានអាល់ហ្សេរី ដោយសុំអោយទាហានអាល់ហ្សេរីដកទ័ពថយប៉ុន្តែទាហានអាល់ហ្សេរី បានសំលាប់ចំណាប់ខ្មាំង ពីរនាក់ ដើម្បីឆ្លើយតបទៅពួកឧទ្ទាមវិញ។ បន្ទាប់ពីនោះមក ឧត្ថម្ភាគចក្រនានា បានទំលាក់គ្រាប់បែក នៅតំបន់នោះ។
ក្រុមឧទ្ទាមបានបដិសេធថា មិនបាននាំចំណាប់ខ្មាំងចេញពីប្រទេសអាល់ហ្សេរីឡើយ ផ្ទុយទៅវិញ ក្រុមខ្លួនបានទៅកាន់រោងចក្រ ដើម្បីការពារអាយុជីវិតពួកអ៊ីស្លាម និងចំណាប់ខ្មាំង។ ក្រុមឧទ្ទាមយល់ថា គឺការវាយប្រហារនៃឧត្ថម្ភាគ ចក្រ របស់ទាហានអាល់ហ្សេរីនេះហើយ ដែលប៉ះពាល់ដោយផ្ទាល់ទៅលើជីវិត របស់ចំណាប់ខ្មាំង។
ក្រុមឧទ្ទាមបានបន្ថែមថា ខ្លួនបានសាកល្បងរកការចរចា ម្តងទៀត ជាមួយក្រុមទាហាន ដោយសុំអោយមានការព្យួរអន្តរាគមន៍ទ័ពនៅម៉ាលី ជាថ្នូរនឹងការដោះលែងចំណាប់ខ្មាំង ប៉ុន្តែទាហានអាល់ហ្សេរី នៅតែបដិសេធ និងបន្តការវាយប្រហារ។
ពួកឧទ្ទាមបានប្រាប់ថា បានទាក់ទងទូរសព្ទ ជាមួយឧត្តមសេនីយ៍អាល់ហ្សេរីមួយរូប ដែលត្រៀមខ្លួន នឹងបំផ្លាញចោលអស់នូវរោងចក្រប្រេង និងឧស្ម័ន In Amenas ក្នុងការវាយប្រហារនេះ។ យោងតាមក្រុមភេរវជនទាំងនេះ ការវាយប្រហាររបស់ទាហានអាល់ហ្សេរី គឺជាការគ្រោងទុកមុនជាស្រេចរបស់រដ្ឋាភិបាល ដើម្បីអោយអាល់ហ្សេរី បានចូលរួមប្រតិបត្តការសង្គ្រាម នៅប្រទេសម៉ាលី តាមរយៈការហោះហើរផ្លូវអាកាស និងការបិទព្រំដែនរបស់ខ្លួន៕ ដោយ ព្រំ សឿន សូលីណា (RFI)
