ស្រវឹងបើករថយន្តរេចង្កូតបុកចូលផ្ទះប្រជាពលរដ្ឋ
ភ្នំពេញ៖ កាលពីវេលាម៉ោង ២០និង១០នាទីយប់ ថ្ងៃទី២០ ខែមករា បុរសម្នាក់បើករថយន្តចេញពីផឹកស៊ីតាមបណ្តោយផ្លូវជាតិលេខ ២៧១ ហើយរេចង្កូតបុកចូលលំនៅដ្ឋានដែលមានយីហោ ណុតស៊ីនន់ ស្ថិតក្នុងសង្កាត់បឹងសាឡាង ខណ្ឌទួលគោក ដ្ឋាន ធ្វើឲ្យរងការខូចខាតជាដំណំ។
មុនពេលកើតហេតុគេបានសង្កេតឃើញ បុរសម្នាក់ស្ថិតក្នុងស្ថានភាពស្រវឹងស្រា បានបើករថយន្តមួយគ្រឿង ម៉ាកហាយឡែនឌឺ ពណ៌ស្ករ ពាក់ស្លាកលេខភ្នំពេញ 2Q-8397 ជិះតាមបណ្តោយផ្លូវលេខ២៧១ ក្នុងទិសដៅពីត្បូងទៅជើង ដោយបានបើកក្នុងល្បឿនយ៉ាងលឿន លុះមកដល់ចំណុចកើតហេតុ ស្រាប់តែរថយន្តមួយគ្រឿងនេះ បានរេចង្កូតទៅខាងស្តាំដៃបុករបង និងធ្លាយដល់ទ្វារលំនៅដ្ឋានដែលមានយីហោ ណុតស៊ីនន់ ដែលបណ្តាលឲ្យរថយន្តបង្កហេតុត្រូវរងការខូចខាតផ្នែកខាងមុខស្ទើរ ទាំងស្រុង និងរបងផ្ទះរួមជាមួយនិងទ្វារផ្ទះត្រូវរងការខូចខាតយ៉ាងដំណំ។ ជុំវិញហេតុការណ៍ខាងលើនេះ ពុំមាននរណាម្នាក់ ត្រូវរងរបួសឡើយ។
ក្រោយពីកើតហេតុសមត្ថកិច្ចនគរបាលខណ្ឌទួលគោក បានចុះមកអន្តរាគមន៍ធ្វើការវាស់វែង នាំយករថយន្តបង្កទៅរក្សាទុកនៅអធិការដ្ឋាននគរបាលខណ្ឌ ដើម្បីរងចាំដោះស្រាយសំណងជូនភាគីម្ចាស់ផ្ទះរងគ្រោះ៕
ដោយ៖ ហេង នាង
