បុរសម្នាក់រងរបួសធ្ងន់ខណៈពេលបើកម៉ូតូទៅបុកទ្រូងផ្លូវ
ភ្នំពេញ៖ កាលពីវេលាម៉ោង២៣និង២០នាទីយប់ថ្ងៃទី ១៧ ខែមករា បុរសម្នាក់ បានជិះម៉ូតូទៅបុកទ្រូងផ្លូវបណ្តាលឲ្យរបួសធ្ងន់ នៅតាបណ្តោយវិថីព្រះសីហនុ ជិតវត្តលង្កា ស្ថិតក្នុងសង្កាត់ចតុមុខ ខណ្ឌដូនពេញ ។
ប្រភពព័ត៌មានបានឲ្យដឹងថាបុរសដែលរងរបួសធ្ងន់ខាងលើនេះពុំទាន់បានស្គាល់អត្តសញ្ញាណនៅឡើយទេ មុនពេលកើតហេតុគេឃើញបុរសរងគ្រោះខាងជិះម៉ូតូមួយគ្រឿងម៉ាក ស្មាស ស៊េរី ២០០៥ ពាក់ស្លាកលេខភ្នំពេញ1A9782 តាមបណ្តោយមហាវិថីព្រះសីហនុ ទិសដៅពីកើតទៅលិច ក្នុងល្បឿនយ៉ាងលឿន លុះមកដល់ចំណុចកើតហេតុបានជ្រុលល្បឿនទៅបុកទ្រូងផ្លូវបណ្តាលឲ្យដួល អូសចំងាយជិតដប់ម៉ែត្រ រងរបួសធ្ងន់ និងម៉ូតូបានរងការខូចខាតស្ទើរតែទាំងស្រុង។
ក្រោយពេលកើតហេតុបុរសរងគ្រោះបានបញ្ចូនទៅសង្គ្រោះនៅមន្ទីរពេទ្យ ដើម្បីធ្វើការសង្គ្រោះបន្ទាន់ចំណែកម៉ូតូត្រូវបានសមត្ថកិច្ចមូលដ្ឋាន បានចុះវាស់វែងដកហូតយកម៉ូតូទៅរក្សាទុកនៅអធិការដ្ឋាននគរបាល ខណ្ឌដូនពេញ ដើម្បីចាត់ការតាមច្បាប់៕
ដោយ៖ ហេង នាង
