ក្រុមក្មេងទំនើង ៣នាក់ជិះម៉ូតូដេញកាប់យុវជនម្នាក់ដាច់ជើងម្ខាង
ភ្នំពេញ ៖ កាលពីវេលាម៉ោង៤រសៀលថ្ងៃទី១៦ ខែមករា យុវជនម្នាក់ បានរងរបួសដាច់ ត្រឹមកជើងខាងឆ្វេង បន្ទាប់ពីមានក្រុមក្មេង ទំនើងចំនួន៣នាក់ផ្សេងទៀត បានជិះម៉ូតូ មកកៀរ ហើយទាញកាំបិត ប៉័ងតោដេញកាប់ ស្ថិតនៅតាមបណ្ដោយ ផ្លូវកម្ពុជាក្រោម សង្កាត់ផ្សារដេប៉ូទី២ ខណ្ឌ ទួលគោក។
យុវជនរងគ្រោះមានឈ្មោះហុង បារាំង ជាសិស្សនៅ សាលាភាសាកូរ៉េ មានទីលំនៅផ្ទះជួល ក្នុង សង្កាត់ស្ទឹងមានជ័យ ខណ្ឌមានជ័យ បានដាច់ ត្រឹមកជើងខាងឆ្វេង រីឯមិត្ដភក្ដិរបស់ខ្លួន ដែលរួចផុតពីគ្រោះថ្នាក់នោះមានឈ្មោះជិន ឡុង អាយុ១៨ឆ្នាំ ជានិស្សិតឆ្នាំទី៣ នៅ សាលាវិទ្យាល័យ ស្នាក់នៅជាមួយជនរងគ្រោះ ខាងលើ។
ប្រភពព័តមានពីកន្លែងកើតហេតុបាន ឱ្យដឹងថា មុនពេលកើតហេតុ ជនរងគ្រោះទាំងពីរនាក់ បានជិះម៉ូតូឌុបគ្នា ដេញពីផ្ទះជួលឆ្ពោះទៅស្រុកកំណើតរបស់ ខ្លួនក្នុងខេត្ដព្រៃវែង លុះមកដល់ចំណុចកើត ហេតុ ក៏ត្រូវក្រុមក្មេងស្ទាវ៣នាក់ ជិះម៉ូតូ មួយគ្រឿង បានបើកមកជិត ហើយកៀរ បណ្ដាលឱ្យដួលម៉ូតូរួចពួកវាបានដកកាំបិត ប៉័ងតោដេញកាប់គ្មានត្រាប្រណី រួចគេចខ្លួន បាត់។
ចំពោះករណីនេះសម្ថកិច្ចនៅមិនទាន់ដឹងពីមូលហេតុពិតប្រាកដនៅ ឡើយទេ ចំពោះករណីនេះ បើទោះបីប្រភព ព័ត៌មានខ្លះបានឱ្យដឹងថា អាចបណ្ដាលមកពី រឿងគំនុំអ្វីមួយ៕
ដោយ៖ ហេង នាង
