ពលករខ្មែរ ១៩នាក់ត្រូវបានស្ថានទូតកម្ពុជានៅឥណ្ឌូនេស៊ីជួយសង្គ្រោះ
ភ្នំពេញ ៖ ឯកឧត្តម កុយ គួង អ្នកនាំពាក្យក្រសួងការបរទេសកម្ពុជាបានឲ្យដឹងថា ថ្មីៗកន្លងទៅនេះ តាមការណែនាំរបស់ក្រសួងការបរទេស និងសហប្រតិបត្តិការអន្តរជាតិ ស្ថានឯកអគ្គរាជទូតកម្ពុជាប្រចាំនៅប្រទេសឥណ្ឌូនេស៊ី បានសហការជាមួយ អាជ្ញាធរឥណ្ឌូនេស៊ី ធ្វើការស្រាវជ្រាវជួយសង្គ្រោះពលករខ្មែរចំនួន១៩នាក់។
ឯកឧត្តម កុយ គួង បានឲ្យដឹងទៀតថា ពលករទាំងនោះបានចាញ់បោក មេខ្យល់ឲ្យទៅធ្វើការជាកម្មករខុសច្បាប់លើទូកនេសាទថៃ នៅកោះបេនឌីណា (Benjina) ប្រទេស ឥណ្ឌូនេស៊ី ហើយរងគ្រោះពីការធ្វើបាបពីថៅកែទូកនេសាទ។
តាមការសំភាសន៍បានបញ្ជាក់ថា ពលករខ្មែរទាំងនេះ ត្រូវមេខ្យល់បោកបញ្ឆោតឲ្យមកធ្វើការនៅប្រទេសថៃ ដោយបានសន្យាផ្តល់ប្រាក់ឈ្នួលច្រើន។ ប៉ុន្តែការពិត ក្រោយពីឆ្លងព្រំដែនកម្ពុជា-ថៃ តាមច្រករបៀងលួចលាក់នៅពេលយប់រួច ពលករទាំងអស់នេះត្រូវបានដឹកតាមឡានលក់ឲ្យទូកនេសាទថៃ នៅតំបន់មហាឆៃ។
ឯកឧត្តម កុយ គួង បានបញ្ជាក់ទៀតថា បច្ចុប្បន្នក្រសួងការបរទេស និងសហប្រតិបត្តិការអន្តរជាតិ កំពុងសហការជាមួយអង្គការទេសន្តរប្រវេសន៍អន្តជាតិ (IOM) ដើម្បី ធ្វើមាតុភូមិនិវត្តន៍ពលករខ្មែររងគ្រោះទាំង១៩នាក់នេះ មកមាតុប្រទេសវិញ។
ជាជំហានដំបូង ពលករចំនួន៨នាក់ នឹងត្រូវត្រឡប់មកប្រទេសយើងវិញនាពេលឆាប់ៗខាងមុខនេះ។ រីឯពលករខ្មែរចំនួន១១នាក់ទៀត ក្រសួងកំពុងបន្តខិតខំសហការជាមួយអង្គការទេសន្តរប្រវេសន៍អន្តរជាតិ ដើម្បីបញ្ជូនពួកគាត់មកប្រទេសកម្ពុជាវិញ ជាបន្តបន្ទាប់៕
