ជិះម៉ូតូឌុបសង្សារធ្លាកជង្ហុកដួលផ្កាប់មុខ និងថ្នល់រងរបួសធ្ងន់
ភ្នំពេញ៖ កាលពីវេលាម៉ោង២១និង១៧នាទី យុវជនម្នាក់ជិះម៉ូតូឌុបសង្សារ មិនបានមើលមុខ ធ្លាកជង្ហុកបន្តិច ដួលខ្ទាតចេញពី ម៉ូតូផ្កាប់មុខនិងថ្នល់ អូសដាច់មុខយ៉ាងដំណំ ចំណែកឯសង្សារវិញ ពុំរងរបួសនោះទេ ស្ថិតនៅតាមបណ្តោយផ្លូវជាតិ លេខ៤ ក្នុងភូមិកំបូល សង្កាត់កំបូល ខណ្ឌពោធិ៍សែនជ័យ។
សាក្សីនៅកន្លែងកើតហេតុ បានឲ្យដឹងថា ជនរងគ្រោះមានឈ្មោះ អ៊ុំ ចន្ទ្រា ភេទប្រុស អាយុ ២១ឆ្នាំ រស់នៅក្នុងភូមិ កំពង់ឈើទាល ឃុំកំពង់ឈើទាល ស្រុកសំបូរ ខេត្តកំពង់ធំ ជិះម៉ូតូមួយគ្រឿងម៉ាកស្មាស់ ស៊េរីឆ្នាំ២០១២ ពណ៌ខ្មៅ គ្មានស្លាកលេខ ជិះក្នុងទិសដៅពីកើតទៅលិច រងរបួសធ្ងន់ ត្រូវបាន ក្រុមសង្គ្រោះលេខ៧១១ កងពលតូចង៧០ ដឹកយកទៅសង្រ្គោះ នៅមន្ទីរពេទ្យព្រះកុសមៈ ហៅមន្ទីរពេទ្យលោកសង្ឃ ចំណែកឯស្រីស្នេហ៍នោះ ពុំត្រូវបានគេស្គាល់ឈ្មោះនោះទេ ។
មុនពេលកើតហេតុជនរងគ្រោះ បានជិះម៉ូតូមួយគ្រឿង ក្នុងទិសដៅពីកើតទៅលិច ក្នុងល្បឿនមធ្យមឌុបសង្សារម្នាក់ ដោយជិះបណ្តើរសាងសងគ្នាបណ្តើរ យ៉ាងផ្អែមត្រជាក់ មិនមើលមុខទេ លុះដល់ចំណុចកើតហេតុ ស្រាប់តែម៉ូតូធ្លាក់ជង្ហុកតែបន្តិចសោះ ស្រាប់តែរ៉េចង្កូច ដួលខ្ទាតចេញពីម៉ូតូផ្កាប់មុខ ឈូសនឹងថ្នល់ដាច់មុខដាច់មាត់យ៉ាងដំណំ។
បច្ចុប្បន្នជនរងគ្រោះ កំពុងសម្រាកព្យាបាល នៅមន្ទីរលោកសង្ឃបន្ត និងម៉ូតូត្រូវនគរបាល យកទៅរក្សាទុកនៅប៉ុស្តិ៍កំបូល ដើម្បីរង់ចាំម្ចាស់ទៅ ទទួលយកទៅវិញ៕
ដោយ៖ ហេង នាង
