បុរសម្នាក់ជិះម៉ូតូទៅបុករថយន្តរងរបួសធ្ងន់
ភ្នំពេញ៖ កាលវេលាម៉ោង១០និង១០ នាទីយប់ ថ្ងៃទី១៣ ខែមករា បុរសម្នាក់ជិះម៉ូតូទៅបុកកញ្ចក់ទ្វារមុខខាងស្តាំរថយន្តហាយឡែនឌឺ បណ្តាលឲ្យដួលសន្លប់ស្តូកស្តឹង នៅមុខសាលាបឋមសិក្សាសន្ឋរម៉ុក តាមបណ្តោយមហាវិថី ម៉ៅសេទុង កែងផ្លូវ១៣៨ ក្នុងសង្កាត់ផ្សារដេប៉ូ២ ខណ្ឌទួលគោ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុបុរសម្នាក់បានជិះម៉ូតូម៉ាកគុបជ្រុង ពណ៌ទឹកប៊ិច តាមបណ្តោយផ្លូវ១៣៨ ពីកើតទៅលិច ក្នុងល្បឿនលឿន មិនបានមើលមុខ ជាហេតុធ្វើឲ្យជាន់ហ្វ្រាំងមិនទាន់ ក៏ជ្រុលទៅបុកទ្វារមុខខាងស្តាំរថយន្តហាយឡែនឌឺ ជិះគ្នា២នាក់ តាមបណ្តោយមហាវិថីម៉ៅសេទុង ក្នុងទិសដៅពីត្បូងទៅជើង បណ្តាលឲ្យអ្នកបើកបរម៉ូតូខ្ទាតផ្ទប់ជាមួយទ្វារកញ្ចក់រថយន្ត រងរបួសជាទម្ងន់ ។
ក្រោយកើតហេតុជនរងគ្រោះត្រូវរថយន្តសាមុយដឹកទៅកាន់មន្ទីរពេទ្យ ដើម្បីធ្វើការសង្គ្រោះ ចំណែករថយន្តនិងម៉ូតូត្រូវបានសមត្ថកិច្ចនាំទៅកាន់អធិការដ្ឋាននគរបាល រាជធានីភ្នំពេញ ដើម្បីចាត់ការតាមច្បាប់៕
