ម៉ូតូសេ១២៥ និងម៉ូតូកង់បីបុកគ្នាបណ្តាលឲ្យរបួស ៨នាក់
ភ្នំពេញ៖ កាលពីវេលាម៉ោង៨និង៣០នាទីព្រឹក ថ្ងៃទី១៤ ខែមករា ម៉ូតូសេ១២៥ពណ៌ខ្មៅ ស៊េរីឆ្នាំ២០១២ ពាក់ស្លាកលេខ ភ្នំពេញ 1AY-9549 បានបុកគ្នាជាមួយម៉ូតូកង់បី បណ្តាលឲ្យម៉ូតូកង់បីក្រឡាប់ផ្ងារជើង ច្រងាង នៅលើកំណាត់ផ្លូវព្រះមុនីវង្សកែងផ្លូវ៤៣២ ស្ថិតក្នុងសង្កាត់បឹងត្របែក ខណ្ឌចំការមន។
ក្នុងហេតុការណ៍ខាងលើនេះ បានបណ្តាលឲ្យអ្នកជិះម៉ូតូកង់បីចំនួន៦នាក់ លូនចេញពីម៉ូតូ កខ្វាសទាំងព្រលឹងចុងសក់រៀងៗខ្លួន។ ក្រោយពេលកើតហេតុអ្នករត់ម៉ូតូកង់បី និងប្រជាពលរដ្ឋបាននាំគ្នាជួយលើកម៉ូតូ ហើយក្នុងហេតុការណ៍នោះគេបានសង្កេតឃើញ អ្នកជិះម៉ូតូកង់បីទាំងអស់ ជាភេទស្រីមានគ្នាចំនួន៦នាក់បានរងរបួសធ្ងន់និងស្រាល។ ដោយឡែកម្ចាស់ម៉ូតូសេ១២៥និងអ្នកបើកម៉ូតូកង់បីក៏រងរបួស បន្តិចបន្តួចដែរ។
ជុំវិញហេតុការណ៍ខាងលើនេះ គេបានសង្កេតឃើញសមត្ថកិច្ចនគរបាលមូលដ្ឋាន ចុះធ្វើការវាស់វែងសម្របសម្រួលឲ្យភាគីទាំងសងខាង ប៉ុន្តែជាលទ្ធិផលភាគីទាំងអស់មិនអាចរកដំណោះស្រាយគ្នាបាន ទើបសមត្ថកិច្ចនាំយកម៉ូតូកង់បីទៅកាន់អធិការដ្ឋានខណ្ឌ ដើម្បីដោះស្រាយតាមផ្លូវច្បាប់៕
ដោយ៖ ហេង នាង
