លោកប្រធានាធិបតីពូទីនប្រើធម៌ក្តៅប្រឆាំងនឹងផ្ទះ “កៅស៊ូ”
និយមន័យនៃ “ផ្ទះកៅស៊ូ”នេះ ដែលជាបាតុភាពថ្មី ក្នុងសង្គមរុស្ស៊ី គឺកើតចេញមក បណ្តាលមកពី ម្ចាស់លំនៅ ឆ្លៀតប្រើផ្ទះខ្លួន យកប្រាក់កម្រៃ សម្រាប់លួចចុះបញ្ជីស្នាក់នៅ ដោយក្លែងបន្លំ ឲ្យពួកកម្មករបន្លាស់ទីបរទេស ដែលមកធ្វើការនៅរុស្ស៊ីដោយខុសច្បាប់។ ដោយហេតុថា លំនៅតែមួយ ប៉ុន្តែ ចុះបញ្ជីស្នាក់នៅឲ្យមនុស្សដល់រាប់សិប រាប់រយនាក់ បានជាគេហៅ លំនៅបែបនេះ ថា “យឺតដូចកៅស៊ូ”។ ប្រាកដណាស់ ដែលម្ចាស់លំនៅបែបនេះ អាចប្រព្រឹត្តទង្វើខ្លួនទៅកើត គឺដោយស៊ុមគ្រលុំ ជាមួយ អាជ្ញាធរដែលគ្រប់គ្រងលើមូលនិធិលំនៅ។
គឺក្នុងគោលដៅ ទប់ស្កាត់បាតុភាពចម្លែកនោះ ដែលនាំឲ្យប៉ះពាល់ដល់សន្តិសុខសង្គម និងដើម្បីមួលខ្ចៅបន្តឹង នាទីទទួលខុសត្រូវ ចំពោះការ រំលោភបំពានលើសណ្តាប់ធ្នាប់ ខាងចុះបញ្ជីស្នាក់នៅ នៃជាតិរុស្ស៊ីបន្លាស់ទីក្នុងស្រុក ក៏ដូចជាជនបន្លាស់ទីបរទេស ដែលប្រមុខរដ្ឋរុស្ស៊ី លោកពូទីនផ្ទាល់ រសៀលម្សិលមិញ បានដាក់ជូនរដ្ឋសភាពិនិត្យមើល សេចក្តីព្រាងច្បាប់សម ស្រប។
គួរនិយាយថា ការចុះបញ្ជីស្នាក់នៅនេះ គឺមានន័យសំខាន់ណាស់ សម្រាប់ជន បន្លាស់ទី ពីព្រោះ នៅលើក្រដាសស្នាមសំគាល់ខ្លួនគេ មានចែងអំពីអាសយ ដ្ឋានដែលគេស្នាក់នៅ ដែលជាចំណុច ចាំបាច់ ដើម្បីនិយោជក យកគេធ្វើការ និងជាតឹកតាងសំអាង ពេលគេត្រូវប៉ូលិសឆែកឆេរ។
សូម្បីតែលោកពូទីនផ្ទាល់ ក្នុងបទពន្យល់បំភ្លឺ ភ្ជាប់នឹងសេចក្តីព្រាងច្បាប់នោះ ក៏បានសរសេរថា ច្បាប់នេះ សំដៅប្រឆាំងនឹង “ផ្ទះដែលយឺតដូចកៅស៊ូ” ជាទីដែលគេឆ្លៀតចុះឈ្មោះមនុស្ស ដល់ទៅរាប់រយនាក់ឯណោះ ឲ្យមានលទ្ធភាពស្នាក់នៅ។
លទ្ធផលអង្កេតធ្វើដោយអាជ្ញាធរសឲ្យឃើញថា ក្នុងឆ្នាំ២០១១ នៅតាមអាសយដ្ឋានចំនួនជាង ៦.៤០០ លំនៅ មានចុះបញ្ជីស្នាក់នៅ ឲ្យជនបន្លាស់ ទី ដល់ទៅ ៣០០.០០០នាក់ឯណោះ បានន័យថា គិតជាមធ្យម ក្នុងលំនៅនីមួយៗ មានចុះបញ្ជីឲ្យស្នាក់នៅដល់ ៤៦នាក់។
ស្របនឹងសេចក្តីព្រាងច្បាប់របស់ប្រធានាធិបតី ដែលមុខជានឹងត្រូវអនុម័តពុំខាន ដោយសភាឌូម៉ា ជាទីដែលពួកតំណាងរាស្ត្រ ខាងបក្សកាន់អំណាចមានភាគ ច្រើនលើសលុប ចំពោះបទឧក្រិដ្ឋ ដែលបំពានលើ សណ្តាប់ធ្នាប់ខាងចុះបញ្ជីស្នាក់នៅឲ្យជនបន្លាស់ទីបរទេស នឹងមានកសាង ជាសំណុំរឿងព្រហ្មទណ្ឌតែម្តង ដែលតម្រូវឲ្យជាប់ពន្ធនាគារ រហូតដល់ ៣ឆ្នាំ ឬ ក្នុងករណីខ្លះ តម្រូវ ឲ្យបង់ប្រាក់ពិន័យ ពី១០០.០០០រូប្ល រហូតដល់ ៥០០.០០០រូប្ល ស្មើនឹង ៣.២០០ ដុល្លារ ទៅ ១ម៉ឺន៦ពាន់ដុល្លារ។ ហើយមន្ត្រីណា ដែលពាក់ព័ន្ធនឹងរឿងនេះ ថែមទាំងត្រូវដកសិទ្ធិ ឲ្យឈប់កាន់តំណែងខ្លួន ដល់ ទៅ ៣ឆ្នាំ។
មិនតែប៉ុណ្ណោះ សម្រាប់ជាតិរុស្ស៊ី ដែលចុះឈ្មោះក្នុងលំនៅបែបនេះ គឺត្រូវបង់ប្រាក់ពិន័យ ដល់១០០ដុល្លារ សម្រាប់ម្ចាស់លំនៅផ្ទាល់ គឺបង់ដល់ ១៦០ ដុល្លារសម្រាប់នីតិបុគ្គលគឺត្រូវបង់ដល់ ២ម៉ឺន៤ពាន់ដុល្លារ។ បើបទល្មើសប្រព្រឹត្ត ក្នុងរដ្ឋធានីម៉ូស្គូ និងក្នុងក្រុងទី២ គឺក្រុង Saint-Petersbourg នោះប្រាក់ពិន័យ គឺ ៖ សម្រាប់ជាតិរុស្ស៊ី ដែលចុះឈ្មោះក្នុងលំនៅបែបនេះ គឺត្រូវបង់ដល់ ១៦០ ដុល្លារ សម្រាប់ម្ចាស់លំនៅផ្ទាល់ គឺបង់ដល់២២៥ដុល្លារ សម្រាប់នីតិបុគ្គល គឺត្រូវ បង់ដល់ ២ម៉ឺន៦ពាន់ដុល្លារ៕ដោយ កែវ ឆាយា (RFI)
