ក្រសួងព័ត៌មានប្រតិកម្មចំពោះអ្នកនាំពាក្យក្រសួងការបរទេសអាមេរិករឿងលោកសម រង្ស៊ី
ភ្នំពេញ៖ កាលពីព្រឹកថ្ងៃទី១០ ខែមករា លោកខៀវ កាញារីទ្ធ អ្នកនាំពាក្យរាជរដ្ឋាភិ បាលកម្ពុជា និងជារដ្ឋមន្ដ្រីក្រសួងព័ត៌មានបានបញ្ចេញប្រតិកម្មឆ្លើយតប ចំពោះការរិះគន់ របស់អ្នកនាំពាក្យក្រសួងការបរទេសសហរដ្ឋអាមេរិក លោកស្រី( Victoria Nuland ) ដែលបានថ្លែងរិះគន់ប្រទេសកម្ពុជាចំពោះករណីមិនទទួលបេក្ខភាពលោកសម រង្ស៊ី ឲ្យឈរឈ្មោះជាតំណាងរាស្ត្រសម្រាប់ការបោះឆ្នោតជាតិ អាណត្តិទី៥ ឆ្នាំ២០១៣ខាងមុខនេះ។
លោកខៀវ កាញារីទ្ធ បានមានប្រសាសន៍ថា អ្នកនាំពាក្យក្រសួងការបរទេសសហរដ្ឋអាមេរិករូបនោះ ប្រហែលជាមិនបានយល់ច្បាស់ពីច្បាប់បោះឆ្នោតនៅកម្ពុជាដែលបាន បញ្ជាក់យ៉ាងច្បាស់ថា ឲ្យតែទណ្ឌិត គឺមិនអាចឈរឈ្មោះឲ្យគេបោះឆ្នោតបានឡើយ។ បើទោះជាអ្នកនយោបាយក្ដី ឬក៏ប្រជាពលរដ្ឋសាមញ្ញក្ដីឲ្យតែជាទណ្ឌិត គឺមិនមានសិទ្ធិឈរឈ្មោះឲ្យគេបោះឆ្នោតបានឡើយ។
ការថ្លែងរិះគន់ របស់អ្នកនាំពាក្យក្រសួងការបរទេស សហរដ្ឋអាមេរិក ខាងលើនេះ បានធ្វើឡើងភ្លាមៗ ខណៈដែលលោក ទេព នីថា អគ្គលេខាធិការ គ.ជ.ប. បានប្រកាសក្នុងសន្និសីទកាសែត កាលពីព្រឹកថ្ងៃសុក្រ ទី៤ ខែមករា ឆ្នាំ២០១៣ ដោយបញ្ជាក់ជាថ្មី អំពីអវត្តមានរបស់លោកសម រង្ស៊ី ដែលសព្វថ្ងៃ ជាប្រធានគណបក្សសង្គ្រោះជាតិ គឺមិនអាចឈរឈ្មោះ ជាបេក្ខជនតំណាងរាស្ត្រ អាណតិ្តទី៥ សម្រាប់ការបោះឆ្នោតជាតិ នៅថ្ងៃទី២៨ ខែកក្កដា ឆ្នាំ២០១៣ បានទេ។
អ្នកនាំពាក្យក្រសួងការបរទេសសហរដ្ឋអាមេរិក លោកស្រី Victoria Nuland បានថ្លែងប្រាប់ទីភ្នាក់ងារព័ត៌មាន The Associated Press កាលពីថ្ងៃសុក្រ ទី៤ ខែមករា ឆ្នាំ២០១៣ថា សហរដ្ឋអាមេរិកមានការខកចិត្តជាខ្លាំងចំពោះសេចក្តីប្រកាសរបស់ គ.ជ.ប. ក្នុងប្រទេសកម្ពុជាដែលថា លោកសម រង្ស៊ី ត្រូវបានលុបឈ្មោះចេញពីបញ្ជីឈ្មោះបោះឆ្នោត ហើយមេដឹកនាំគណបក្សប្រឆាំងដែលកំពុងនិរទ្ទេសខ្លួន នៅក្រៅប្រទេសលោកសម រង្ស៊ី ក៏នឹងមិនត្រូវអនុញ្ញាតឲ្យឈរឈ្មោះជាតំណាងរាស្ត្រ សម្រាប់ចូលរួមការបោះឆ្នោតជាតិ នៅថ្ងៃទី២៨ ខែកក្កដា ឆ្នាំ២០១៣ឡើយ ពីព្រោះតែលោកត្រូវបានតុលាការផ្តន្ទាទោសកំបាំងមុខដាក់ពន្ធនាគារ សរុបចំនួន១២ឆ្នាំ ក្នុងរឿងព្រំដែនកម្ពុជា-វៀតណាម។
អ្នកនាំពាក្យក្រសួងការបរទេសសហរដ្ឋអាមេរិក លោកស្រី Victoria Nuland បានថ្លែងទៀតថា “ក្រុមអ្នកសង្កេតការណ៍ដែលគួរឲ្យជឿជាក់បានចាត់ទុកថា សាលក្រមផ្តន្ទាទោសលើលោកសមរង្ស៊ី គឺពាក់ព័ន្ធនឹងរឿងនយោបាយសុទ្ធសាធ” ហើយការបង្ខំឲ្យលោកសម រង្ស៊ី ចេញទៅរស់នៅក្រៅប្រទេសនាំឲ្យមានការចោទជាសំណួរអំពីភាពស្របច្បាប់នៃ ដំណើរការលទ្ធិប្រជាធិបតេយ្យនៅក្នុងប្រទេសកម្ពុជា៕
