ស្រវឹងបើករថយន្តបុកបង្គោលស្លាកឈ្មោះ
ភ្នំពេញ៖ កាលពីវេលាម៉ោង ២និង៣០នាទី ទៀបភ្លឺ ឈានចូល ថ្ងៃទី១១ ខែមករា បុរសម្នាក់ស្រវឹងបើករថយន្តទៅបុកបង្គោលស្លាកឈ្មោះផ្លូវ នៅចំណុចមហាវិថី ព្រះមុនីវង្សកែង២៥២ ក្នុងសង្កាត់ចតុមុខ ខណ្ឌដូនពេញ ក្រោយពីបង្ក ដោយអ្នកបើកបរស្រវឹងខ្លាំងពេក ក៏ដេកលក់ក្នុងរថយន្តនោះតែម្តង។សមត្ថកិច្ចបានឲ្យដឹងថា រថយន្តកាមរីបាឡែនខាងលើនេះ ពណ៌ស ពាក់ស្លាកលខភ្នំពេញ 2V-6151 បើកបរដោយបុរសម្នាក់ ដែលស្ថិតក្នុងស្ថានភាពស្រវឹងខ្លាំង។
សាក្សីបានឲ្យដឹងថា មុនពេលកើតហេតុ គេឃើញរថយន្តនេះ តាមមហាវិថីព្រះមុនីវង្ស ពីត្បូងទៅជើង ខណៈមកដល់ចំណុចកើតហេតុ បានរេចង្កូតទៅបុកស្លាក មហាវិថីព្រះមុនីវង្ស កែង ផ្លូវលេខ២៥២ ធ្វើឲ្យទ្រេតបង្គោលរួចហើយរថយន្តបង្កព្យាយាមបើក ថយក្រោយ បានបន្តិចបម្រុងបើករត់គេច ប៉ុន្តែស្រវឹងខ្លាំងពេកបានដេកលង់លក់នៅក្នុងរថយន្តតែម្តង រហូតសមត្ថកិច្ចមកដាស់ក៏មិនព្រមភ្ញាក់ដែរ។ រថយន្តបង្កត្រូវសមត្ថកិច្ចស្ទូចយកទៅរក្សាទុកនៅសាលារាជធានីភ្នំពេញ ៕
ដោយ៖ ហេង នាង
