ដេញចាប់ចោរឆក់ផ្អើលខណ្ឌចំការមន
ភ្នំពេញ ៖ កាលពីវេលាម៉ោង ២០ និង ២០ នាទីយប់ថ្ងៃទី១០ ខែមករាភាពភ្ញាក់ផ្អើលមួយបានកើតឡើងនៅចំណុចមុខមន្ទីរពេទ្យមិត្តភាពខ្មែរ សូវៀត ក្នុងសង្កាត់ទំនប់ទឹកខណ្ឌចំការមន ក្នុងខណៈដែលកងកម្លាំងព្រហ្មទណ្ឌ ខណ្ឌចំការមន សហការជាមួយនិងប៉ូលិសមូលដ្ឋាន ដេញឡោព័ទ្ធចាប់ក្រុមចោរ ដែលធ្វើសកម្មភាពឆក់កាបូបពីស្ត្រីម្នាក់ ។
ប្រភពព័ត៌មានមួយបានបង្ហើបឲ្យដឹងថា មុនពេលកើតហេតុ នគរបាលមូលដ្ឋាននៅក្នុងភូមិសាស្ត្រខណ្ឌចំការមន បានដាក់ល្បាតក្នូងមូលដ្ឋានរបស់ខ្លួន ស្រាប់តែឃើញជនសង្ស័យពីរនាក់ជិះម៉ូតូម៉ាកវ៉េវ គួរឲ្យសង្ស័យក៏នាំគ្នាដេញព័ទ្ធដើម្បីធ្វើការសាកសួរ ប៉ុន្តែខណៈនោះជនសង្ស័យបានព្យាយាមជិះម៉ូតូរត់គេចខ្លួនបាត់រហូត មកដល់មុខមន្ទីរពេទ្យមិត្តភាពខ្មែរសូវៀត ពួកគេបានផ្តួលម៉ូតូចោល រត់គេចខ្លួនចូលទៅក្នុងលូបង្ហូរទឹកសំអុយ បាត់ស្រមោសតែម្តងទៅ ។ ដោយក្នុងប្រតិបត្តិការណ៍យ៉ាងកក្រើកខណ្ឌចំការមននេះ សមត្ថកិច្ចមានសមត្ថភាពឃាត់ត្រឹមម៉ូតូប៉ុណ្តោះ ព្រោះក្រុមជនសង្ស័យរត់រួច។
នៅក្នុងម៉ូតូដែលក្រុមចោរជិះធ្វើសកម្មភាពខាងលើនេះ សមត្ថកិច្ចបានឆែកឆេររកឃើញកាបូបស្រីនៅក្នុងកែបម៉ូតូមានអត្តសញ្ញាណ ប័ណ្ឌ និង លិខិតឆ្លងដែន។
បន្ទាប់ពីសមត្ថកិច្ចគិតថាឡោមព័ទ្ធចាប់ជនសង្ស័យមិនបាននោះក៏ដក កម្លាំងដើរល្បាតក្នុងមូលដ្ឋានដោយបាននាំយកម៉ូតូមួយគ្រឿងរបស់ក្រុម ជនសង្ស័យយកទៅរក្សាទុកនៅអធិការដ្ឋាននគរបាលខណ្ឌចំការមន ដើម្បីរងចាំការស្រាវជ្រាវតាមចាប់ខ្លួនជនសង្ស័យ៕
