រថយន្តដឹកគោបុក បុរសម្នាក់ កំពុងជិះម៉ូតូបាក់ភ្លៅទាំងសងខាង
ភ្នំពេញ៖ កាលពីវេលាម៉ោង ២០ និង ៤០ នាទីយប់ថ្ងៃទី០៩ មករា បុរសម្នាក់បាន រងរបួស ធ្ងន់ធ្ងរ ក្នុងខណៈដែលជិះម៉ូតូ មួយគ្រឿងក្នុងល្បឿនលឿន ហើយត្រូវបានរថយន្តដឹកគោ មួយគ្រឿង ដែលបើកបរបញ្រ្ចាសទិស បានបុកពេញទំហឹង នៅតាម បណ្តោយផ្លូវចំការ ដូង ភូមិខ្វារ សង្កាត់ដង្កោ ខណ្ឌដង្កោ។
មុនពេលកើតហេតុគេសង្កេតឃើញ បុរសម្នាក់ វ័យជាង៣០ ឆ្នាំ បានជិះម៉ូតូមួយគ្រឿង ម៉ាកគុបជ្រុង ពណ៌ទឹកប៊ិច គ្មានស្លាកលេខ បានបើកបរតាម បណ្តោយផ្លូវ ចំការដូង ក្នុង ទិសដៅពី ជើងទៅត្បូង ដោយបានជិះក្នុងល្បឿន យ៉ាងលឿន លុះជិះមកដល់ចំណុចមុខ ទីស្នាក់ ប៉ុស្តិ៍ដង្កោ ស្រាប់តែរថយន្ត កូរ៉េមួយគ្រឿង ពណ៌ខៀវ ដឹកគោពេញរថយន្តតែម្តង ដែលកំពុង បើកបរបញ្ច្រាស ទិសគ្នា ជាមួយម៉ូតូបានរេចង្កូត បុកគ្នាជាមួយម៉ូតូចំពេញ ទំហឹង លាន់លឺសូរដូចរន្ទះ ដែលបណ្តាលឲ្យ ក្បាលរួញគៀបជាប់ និងក្បាលរថយន្ត រង ការខូចខាតទាំងស្រុង ។
ចំណែកបុរសជាម្ចាស់ម៉ូតូវិញនោះបានហោះផ្លោងបោកខ្ទប់ ទៅនឹងកញ្ជាក់រថយន្តធ្លាក់ មកក្រោមត្រូវរថយន្តបើក កិនបាក់ ភ្លៅទាំងសងខាង គឺរងរបួសយ៉ាងធ្ងន់ធ្ងរ ត្រូវដឹកបញ្ជូន ទៅសង្គ្រោះនៅមន្ទីរពេទ្យមិត្តភាពខ្មែរសូរវៀត ដោយសមត្ថកិច្ចមិនទាន់ស្គាល់អត្ត សញ្ញាណគេឡើយព្រោះគ្មានអត្តសញ្ញាណនៅជាប់ខ្លួនរបស់គេ និងអ្នកបើកបររថយន្ត ត្រូវសមត្ថកិច្ចឃាត់ខ្លួន យកទៅទីស្នាក់ ការប៉ុស្តិ៍ដង្កោ។
បន្ទាប់ពីកើតហេតុសមត្ថកិច្ច មូលដ្ឋាននិងនគរបាលចរាចរណ៍ខណ្ឌដង្កោ បានចុះមក អន្តរាគមន៍វាស់វែងយក រថយន្តបង្ក ហេតុ នឹងម៉ូតូរបស់ជនរងគ្រោះទៅ រក្សាទុកនៅអធិ ការដ្ឋាននគរបាលខណ្ឌដង្កោ ដើម្បីដោះស្រាយ នាពេលក្រោយ៕
ដោយ៖ ហេង នាង
