អ្នកមានជម្លោះដីធ្លីដាក់ញត្តិសុំអន្តរាគមន៍ពីកូននាយករដ្ឋមន្ត្រី
កម្លាំងសមត្ថកិច្ចជិត១០០នាក់ ប្រដាប់ដោយខែល និងដំបង ត្រូវបានគេដាក់ពង្រាយ នៅលើមហាវិថីសហព័ន្ធរូស្ស៊ី ជិតទីស្តីការគណៈរដ្ឋមន្ត្រី រារាំងសហគមន៍ដែលមានជម្លោះដីធ្លី មិនឲ្យដាក់ញត្តិ ស្វែងរកអន្តរាគមន៍ ពីកូនប្រុសច្បងរបស់នាយករដ្ឋមន្ត្រី។
ស្រ្តីអ្នកភូមិទាំងនោះមកពីតំបន់បឹងកក់ អតីតបុរីកីឡា និងសហគមន៍ថ្មគោល ដែលមានគ្នាប្រហែល៥០នាក់។ ពួកគេបានប្រតិកម្មទៅការរារាំងជាថ្មីម្តងទៀត នៅថ្ងៃទី៩ មករានេះ ថា ជារឿងអយុត្តិធម៌មួយទៀតដល់ពួកគេ បន្ទាប់ពី តុលាការចាប់ពួកគេដាក់ពន្ធនាគារ ដោយសារតែចេញមុខរកយុត្តិធម៌រឿងជម្លោះដីធ្លីនៅក្នុងសហគន៍របស់ខ្លួន។
ទោះជាយ៉ាងណា ក្រោយការប្រឈមមុខដាក់គ្នា រវាងកម្លាំងសមត្ថកិច្ចនិងក្រុមអ្នកតវ៉ាច្រើនម៉ោងរួចមក តំណាងទីស្តីការគណៈរដ្ឋមន្ត្រី និងជាមេធារីការពាររដ្ឋាភិបាល គឺលោក ប៉ាល់ ច័ន្ទតារា បានចេញមកទទួលញត្តិពីអ្នកមានជម្លោះដីធ្លី ប៉ុន្តែមិនបានសន្យាពីដំណោះស្រាយទេ។
មន្ត្រីស៊ើបអង្កេតជាន់ខ្ពស់នៅអង្គការលីកាដូ លោក អំ សំអាត ធ្លាប់អះអាងថា ការរារាំងណាមួយមិនឲ្យពលរដ្ឋជាអ្នករងគ្រោះ ស្វែងរកដំណោះស្រាយ ដោយសន្តិវិធី ពីស្ថាប័នពាក់ព័ន្ធលោកថាជាការរំលោភសិទ្ធិមនុស្ស និងបិទសេរីភាពបញ្ចេញមតិ ក្នុងរបបមួយដែលប្រកាន់លិទ្ធិប្រជាធិបតេយ្យ។
បើតាមអ្នកភូមិ នៅថ្ងៃដដែលនេះ ពួកគេក៏បានដាក់ញត្តិ ទៅធនាគារពិភពលោកឲ្យជួយដាក់សម្ពាធលើរដ្ឋាភិបាលកម្ពុជា ឲ្យជំរុញទៅអាជ្ញាធរមូលដ្ឋាន ពន្លឿនដោះស្រាយបញ្ហាដីធ្លី បញ្ឈប់ការបណ្តេញចេញ និងអនុវត្តតាមយុទ្ធសាស្ត្ររបស់រដ្ឋាភិបាលស្តីពីកំណែទំរង់ដីធ្លី៕
