ស្រវឹងបើករថយន្តបុករបាំងដែកចែកទ្រូងផ្លូវបាក់អស់ប្រាំបីកង់
ភ្នំពេញ៖ កាលពីវេលាម៉ោង២១និង០៥នាទីយប់ថ្ងៃ ទី៨ ខែមករា បុរសម្នាក់ស្រវឹងស្រាបើក រថយន្តទៅបុករបាំងដែកចែកទ្រូងផ្លូវ បណ្តាលឲ្យបាក់អស់ប្រាំបីកង់ ស្ថិតនៅតាមបណ្តោយផ្លូវ សហព័ន្ធរុស្ស៊ី ស្ថិតក្នុងភូមិចុងថ្នល់ សង្កាត់ទឹកថ្លា ខណ្ឌសែនសុខ ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តមួយ គ្រឿងម៉ាកកាមរីឆ្លាម ពណ៌ខ្មៅ ពាក់ស្លាកលេខ ភ្នំពេញ 2G3193 បើកបរដោយបុរសម្នាក់ស្រវឹងស្រាជោគ តាមបណ្តោយផ្លូវសហព័ន្ធរុស្ស៊ី ក្នុងទិសដៅពីលិចទៅកើត ក្នុងល្បឿនលឿន លុះបើកមកដល់ចំណុចកើតហេតុខាងលើក៏ជ្រុលល្បឿនទៅបុករបាំងដែកចែក ទ្រូង ផ្លូវបណ្តាលឲ្យបាក់អស់ប្រាំបីកង់ និងរថយន្តខូចខាតផ្នែកខាងមុខ។
ក្នុងហេតុការណ៍ខាងលើនេះពុំមានបណ្តាលឲ្យមនុស្សណា ម្នាក់បានរងរបួសឡើយ។ បច្ចុប្បន្នរថយន្តបង្កហេតុត្រូវបានសមត្ថកិច្ចជំនាញចុះធ្វើការ វាស់វែងដកហូតយករថយន្តទៅរក្សាទុកកនៅសាលារាជធានីដើម្បីចាត់ការ តាមច្បាប់៕
ដោយ៖ ហេង នាង
