ម្នាក់ស្រវឹងបើករថយន្តបុករទេះដឹកបន្លែបណ្តាលឲ្យប្តីប្រពន្ធ២នាក់រងរបួសធ្ងន់
ភ្នំពេញ ៖ កាលពីវេលាម៉ោង ៤និង១០នាទីទាបភ្លឺ ថ្ងៃទី១៣ ខែធ្នូ ប្តីប្រពន្ធ១គូរត្រូវរងរបួស ធ្ងន់ធ្ងរ ខណៈដែលពួកគេបើកបរម៉ូតូអូសរទេះដឹកបន្លែ តាមបណ្តោយផ្លូវ២៧១ ហើយត្រូវ រថយន្ត បើកបរដោយបុរសម្នាក់ស្រវឹងស្រា បានបើកបុកពេញទំហឹង នៅចំណុចជិតខ្លោង ទ្វាវត្តដំបូងខ្ពស់ ក្នុងសង្កាត់ផ្សារដើមថ្កូវ ខណ្ឌចំការមន។
សមត្ថកិច្ចដែលចុះទៅត្រួតពិនិត្យនិងវាស់វែង ដល់ចំណុចកើតហេតុបានឲ្យដឹងថា រថយន្តបង្កហេតុម៉ាក EVEREST ពណ៌ខ្មៅ ពាក់ស្លាកលេខភ្នំពេញ 2T-5214 បើកបរដោយបុរសម្នាក់មិនស្គាលអត្តសញ្ញាណ។
សាក្សីដែលឃើញហេតុការណ៍បានឲ្យដឹងថា មុនពេលកើតហេតុ គេសង្កេតឃើញប្តីប្រពន្ធមួយគូរ ជិះម៉ូតូអូសរទេះដឹកបន្លែ តាមបណ្តោយផ្លូវ២៧១ ក្នុងទិសដៅពីត្បូងទៅជើង លុះមកដល់ចំណុចកើតហេតុខាងលើ ស្រាប់តែមានរថយន្តម៉ាក EVEREST ដែលបើកបរបញ្ច្រាសទិសគ្នា ជាមួយម៉ូតូដឹកបន្លែ ហើយបានរេចង្កូតចូលមកផ្លូវរបស់ម៉ូតូអូសរទេះ ជ្រុលបុកម៉ូតូអូសរទេះពេញទំហឹង បណ្តាលឲ្យម៉ូតូនិងរទេះដឹកបន្លែដាច់ចេញពីគ្នាខ្ចេចពីគ្នា និងអ្នកបើកបរ ដែលត្រូវជាប្តី ត្រូវរងរបួសបាក់ជើង និងបែកក្បាល និងប្រពន្ធដែលមានផ្ទៃពោះ៨ខែ ត្រូវរថយន្តកិនដាច់ម្រាមដៃ និងម្រាមជើង គឺស្ថិតក្នុងស្ថានភាពធ្ងន់ធ្ងរបំផុត។
ក្រោយពីកើតហេតុ សមត្ថកិច្ចមូលដ្ឋាន បានចុះមកអន្តរាគមន៍ ហៅរថយន្តសាមុយមកដឹក២នាក់ប្តីប្រពន្ធដែលរងរបួស ទៅសង្គ្រោះនៅមន្ទីពេទ្យមិត្តភាពខ្មែរ-សូវៀត។ រថយន្តបង្កហេតុរួមជាមួយអ្នកបើកបរ និងម៉ូតូអូសរទេះដឹកបន្លែ ត្រូវសមត្ថកិច្ចមូលដ្ឋាន និងនគរបាលចរាចរខណ្ឌចំការមន សហការជាមួយប៉ូលិសជំនាញ ស្ទូចយកទៅរក្សាទុក នៅការិយាល័យ ចរាចរជើងគោក រាជធានីភ្នំពេញ ដើម្បីដោះស្រាយតាមផ្លូវច្បាប់៕
ដោយ៖ ហេង នាង
