អាមេរិកនឹងធ្វើតេស្តសាកល្បងសមត្ថភាពមីស៊ីលរបស់ខ្លួនដើម្បីបាញ់ទម្លាក់មីស៊ីលរបស់កូរ៉េខាងជើង
សារព័ត៌មាន Cambodia News/
អាមេរិក (២០ មេសា ២០១៧) ៖ តាមគេហទំព័រសារព័ត៌មាន CNN បានផ្សព្វផ្សាយនៅថ្ងៃទី១៩ ខែមេសា ឆ្នាំ២០១៧នេះឲ្យដឹងថា មន្ទីរប៉ង់តាហ្គោន (Pentagon) នៃក្រសួងការពារជាតិសហរដ្ឋអាមេរិកនឹងធ្វើតេស្តសាកល្បងសមត្ថភាពមីស៊ីលរបស់ខ្លួននៅក្នុងខែឧសភា ឆ្នាំ២០១៧ខាងមុខឆាប់ៗដើម្បីបាញ់ទម្លាក់មីស៊ីលរបស់ប្រទេសកូរ៉េខាងជើង និងដើម្បីធ្វើឲ្យប្រាកដថា សហរដ្ឋអាមេរិកអាចការពារប្រឆាំងនឹងការគំរាមកំហែងដោយអាវុធមីស៊ីលពីប្រទេសកូរ៉េខាងជើង ។
មន្ត្រីយោធាអាមេរិកបានបញ្ជាក់ឲ្យដឹងថា ការធ្វើតេស្តសាកល្បងនូវសមត្ថភាពមីស៊ីលរបស់សហរដ្ឋអាមេរិកនេះនឹងត្រូវបាញ់ចេញពីនាវាចម្បាំងនៅតំបន់មហាសមុទ្រប៉ាស៊ីហ្វិក ដែលជាទីតាំងធំទូលាយមានភាពអំណោយផលដល់ការធ្វើតេស្តសាកល្បង ។
គម្រោងនៃការធ្វើតេស្តសាកល្បងសមត្ថភាពមីស៊ីលរបស់សហរដ្ឋអាមេរិកដើម្បីត្រៀមបាញ់ទម្លាក់មីស៊ីលរបស់ប្រទេសកូរ៉េខាងជើងនេះ បានកើតឡើងក្រោយពេលមានភាពតានតឹងនៅតំបន់ឧបទ្វីបកូរ៉េពាក់ព័ន្ធនឹងកម្មវិធីអភិវឌ្ឍន៍អាវុធមីស៊ីល និងអាវុធនុយក្លេអ៊ែររបស់ប្រទេសកូរ៉េខាងជើងផ្គើននឹងបម្រាមរបស់អង្គការសហប្រជាជាតិ និងសហរដ្ឋអាមេរិក ព្រមទាំងសម្ព័ន្ធមិត្តអាមេរិកអស់ជាច្រើនលើកច្រើនសារួចមក ៕
