សម្តេច ហ៊ុន សែន លើកឡើងថា វិស័យកីឡាកម្ពុជានឹងរីកចម្រើនពេលពហុកីឡាដ្ឋានមរតកតេជោសាងសង់រួចរាល់
សារព័ត៌មាន Cambodia News/
ភ្នំពេញ (១៦ វិច្ចិកា ២០១៥) ៖ សម្តេច ហ៊ុន សែន លើកឡើងថា វិស័យកីឡាកម្ពុជានឹងរីកលូតលាស់ឆាប់រហ័សក្នុងពេលដ៏ខ្លី ក្រោយពេលដែលពហុកីឡាដ្ឋានជាតិ មរតកតេជោ សាងសង់រួចនៅមុនឆ្នាំ២០២៣ខាងមុខនេះ។ នេះបើតាមការឱ្យដឹងនៅលើបណ្តាញសង្គមហ្វេសប៊ុក សម្តេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នារសៀលថ្ងៃទី១៥វិច្ឆិកា។
ជាមួយគ្នានេះ សម្តេច ហ៊ុន សែន បានលើកទឹកចិត្ត និងជំរុញយុវជនឲ្យចូលរួមក្នុងវិស័យកីឡាឱ្យកាន់តែច្រើន ពិសេស កីឡាវាយកូនហ្គោល ព្រោះវាជាប្រភេទកីឡាងាយហ្វឹកហាត់ ដែលយើងអាចចូលរួមប្រកួតលើឆាកអន្តរជាតិបាន។ សម្តេច ហ៊ុន សែនបន្តថា សព្វថ្ងៃយើងមានទីលានហាត់វាយកូនហ្គោលជាច្រើនកន្លែងដែលជួយសម្រួលដល់ការហ្វឹកហាត់របស់កីឡាករ ដែលមានចំណង់ចំណូលចិត្តលើកីឡាវាយកូនហ្គោល។
សូមជម្រាបថា ពហុកីឡាដ្ឋានជាតិមរតកតេជោ បានសាងសង់ឡើងកាលពីខែមេសា ឆ្នាំ២០១៣ មានទីតាំងស្ថិតក្នុងសង្កាត់បាក់ខែង ខណ្ឌឬស្សីកែវ ក្នុងតំបន់អភិវឌ្ឍន៍របស់ឧកញ៉ាលីយ៉ុងផាត់ លើទំហំផ្ទៃដីជាង៨៥ហិកតា ដែលអាចផ្ទុកអ្នកអង្គុយទស្សនាបានរហូតដល់ទៅជាង៧ម៉ឺននាក់។ តាមគម្រោង ពហុកីឡាដ្ឋាននេះនឹងសម្រេចការសាងសង់១០០ភាគរយយ៉ាងយូរនៅឆ្នាំ២០២១ខាងមុខ៕
