រដ្ឋមន្រ្តីជប៉ុនផ្គើនចិន ដោយបន្តចូលទៅគោរពសព នៅវិហារយ៉ាស៊ូគូនី
នៅថ្ងៃបង្ហើយពិធីបុណ្យសរទរដូវ នៅថ្ងៃអាទិត្យទី ២០ តុលា មន្រ្តីជាន់ខ្ពស់រដ្ឋាភិបាលជប៉ុនបានចូលទៅគោរពវិញ្ញាណក្ខន្ធ នៅវិមានសពដ៏ចម្រូងចម្រាស យ៉ាស៊ូគូនី។ នោះបើទោះបីជាមានការថ្កោលទោស និងការព្រមានពីទីក្រុងប៉េកាំង និងសេអ៊ូល។ ប្រទេសជិតខាងទាំងពីររបស់ជប៉ុនបានចាត់ទុកវិមានសពយ៉ាស៊ូគូនីថា ជាកន្លែងតំណាងឲ្យការរំលោភឈ្លានពានរបស់កងទ័ពជប៉ុន ទៅលើចិន និងកូរ៉េ។
សារព្រមានរបស់ចិនទៅរដ្ឋាភិបាលជប៉ុន តាមរយៈឯកអគ្គរាជទូតជប៉ុន នៅប៉េកាំង កាលពីថ្ងៃសុក្រកន្លងទៅ គ្មានប្រសិទ្ធិភាព និងគ្មានឥទ្ធិពលដើម្បីរារាំងមន្រ្តីរដ្ឋាភិបាលជប៉ុនកុំឲ្យគោរព វិញ្ញាណក្ខន្ធ នៅវិមានសព យ៉ាស៊ូគូនី។
នៅពីរថ្ងៃក្រោយរដ្ឋមន្រ្តីទទួលបន្ទុកកិច្ចការផ្ទៃក្នុង និងសមាជិកសភា ចូលទៅគោរពវិញ្ញាណក្ខន្ធ គឺនៅថ្ងៃអាទិត្យទី ២០តុលា ដល់វេនរដ្ឋមន្រ្តីម្នាក់ទៀត របស់រដ្ឋាភិបាលលោកShinzo Abe គឺលោកKeiji Furuya ដែលទទួលបន្ទុកខាងជនរងគ្រោះជប៉ុន ត្រូវគេចាប់ជំរិត នៅកូរ៉េខាងជើង ជាអ្នកចូលទៅវិមានយ៉ាស៊ូគូនី។ ចំណែក កាលពីថ្ងៃសៅរ៍ម្សិលមិញ បើទោះបីជាលោកនាយករដ្ឋមន្រ្តីជប៉ុនមិនបានទៅវិហារយ៉ាស៊ូគូនី ដ៏ចម្រូងចម្រាស ប៉ុន្តែ ប្អូនប្រុសរបស់លោក Abe ដែលកាន់តំណែងជាអនុរដ្ឋមន្រ្តីការបរទេសជប៉ុនបានចូលទៅបន់ស្រន់ នៅវិមានដែលមានកប់សពទាហានជប៉ុន ជាង ២លាន ៥សែននាក់។ អំណះអំណាងរបស់មន្រ្តីរដ្ឋាភិបាលជប៉ុនមានតែមួយ គឺពួកគេចូលទៅគោរពវិញ្ញាណក្ខន្ធទាហានជប៉ុន ដែលបានបូជាជីវិតដើម្បីបុព្វហេតុមាតុភូមិ។
យោងតាមទីភ្នាក់ងារព័ត៌មានក្យូដូ ដែលបានស្រង់សំដីរបស់ទីប្រឹក្សាផ្ទាល់របស់នាយករដ្ឋមន្រ្តី លោកShinzo Abe ទំនងនឹងធ្វើដំណើរទៅវិហារយ៉ាស៊ូគូនីនេះដែរ នៅចុងឆ្នាំនេះ គឺក្នុងឱកាសគម្រប់ខួបមួយឆ្នាំ នៃការចូលកាន់តំណែងរបស់លោក ជានាយករដ្ឋមន្រ្តីជប៉ុន កាល ពីខែឆ្នូ ឆ្នាំ ២០១២។ បើតាមទីប្រឹក្សាដដែល តាមទម្លាប់ គេត្រូវចូលទៅគោរពវិញ្ញាណក្ខន្ធឲ្យបានយ៉ាងតិចម្តង ក្នុងមួយឆ្នាំ។ លោកAbeមានការសោកស្តាយ ដែលលោកមិនបានចូលទៅគោរពសព កាលពីលោកធ្លាប់ធ្វើជានាយករដ្ឋមន្រ្តីជប៉ុន កាលពីឆ្នាំ ២០០៦ និង២០០៧។
លោកShinzo Abe មកពីក្រុមអភិរក្សនិយម ប្រកាន់និន្នការនយោបាយជាតិ។ រហូតមកដល់ពេលនេះ ក្នុងតំណែង ជានាយករដ្ឋមន្រ្តី លោកមិនទាន់ធ្វើដំណើរទៅគោរពវិញ្ញាណក្ខន្ធ នៅឡើយ ប៉ុន្តែ លោកបានឆ្លៀតបញ្ជូនអំណោយបីដងហើយ ទៅវិហារយ៉ាស៊ូគូនី។ កាលពីថ្ងៃសុក្រ ទីក្រុងប៉េកាំងបានរំលឹករួចហើយ ដល់លោកនាយករដ្ឋមន្រ្តីជប៉ុន កុំឲ្យធ្វើដំណើរទៅវិមានសព យ៉ាស៊ូគូនី ដើម្បីជាការគោរព ដល់ជនរងគ្រោះ ដែលស្លាប់ដោយសារស្នាដៃរបស់ទាហានជប៉ុន៕ដោយ ឈាង បុប្ផា (RFI)
