បុរសស្រឡាញ់បុរសនិងការរើសអើងនាំឲ្យមានបញ្ហាសុខភាពបន្តពូជ
ដោយ សុវណ្ណវត្តី
នៅក្នុងបទដ្ឋានសង្គមកម្ពុជា ប្រជាជនភាគច្រើននៅមានអារម្មណ៍មាក់ងាយនិងការរើសអើងដល់ “បុរសស្រឡាញ់បុរស” ដែលពួកគាត់តែងតែហៅថា ពួក “ខ្ទើយ” នោះ។
មន្រ្តីជំនាញការងារបុរសស្រឡាញ់បុរសបាននិយាយថា នៅក្នុងសង្គមបច្ចុប្បន្ន បុរសស្រឡាញ់មានពីរក្រុមធំៗ គឺក្រុមសក់វែង (ឬហៅថា ក្រុមស្រីស្រស់ ដែលជាក្រុមមនុស្សប្រុសតែងខ្លួនជាស្រីយកបុរសគ្នាឯងធ្វើជាប្តី) និងក្រុមសក់ខ្លី ខណៈដែលក្រុមសក់ខ្លីនេះ មានខ្លះចេញមុខខ្លះក៏លាក់មុខ។
លោក ជួប សុខចំរើន នាយករងទទួលបន្ទុកប្រតិបត្តិការទូទៅរបស់អង្គការខាណាបាននិយាយថា បុរសស្រឡាញ់បុរសខ្លះ ពិសេសក្រុមសក់ខ្លីអាចរួមភេទបានទាំងជាមួយបុរសនិងជាមួយស្រ្តី ហើយ ពួកគេខ្លះទៀតនៅតែយល់ខុសទាំងស្រុងថា ការរួមភេទជាមួយបុរសដូចគ្នាមិនមានឆ្លងមេរោគអេដស៍ឡើយ។
របាយការណ៍របស់មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគនៃក្រសួងសុខាភិបាលបានឲ្យដឹងថា អត្រាប្រវ៉ាឡង់នៃការឆ្លងមេរោគអេដស៍នៅក្នុងចំណោមបុរសស្រឡាញ់បុរសមាន ២,១% និងក្រុមស្រីស្រស់មាន ៩,៨%។ នេះជាអត្រាមួយមានកម្រិតខ្ពស់ ដែលតម្រូវឲ្យស្ថាប័នជំនាញពាក់ព័ន្ធទាំងអស់នៅថ្នាក់ជាតិនិងនៅថ្នាក់ក្រោមជាតិយកចិត្តទុកដាក់ខ្ពស់។
ដោយសារតែសង្គម និងផ្នត់គំនិតជាទូទៅរបស់ប្រជាជនកម្ពុជានៅមិនទាន់ទទួលស្គាល់ថា បុរសស្រឡាញ់បុរស ដូចពលរដ្ឋដទៃ នោះនាំឲ្យពួកគេស្ថិតនៅក្នុងសភាពឯកោ ហើយប្រឈមនឹងការមាក់ងាយនិងការរើសអើងទាំងនៅក្នុងគ្រួសារនិងនៅក្នុងសង្គម។ បើតាមការអង្កេតទូទៅ ការមាក់ងាយនិងការរើសអើងដល់បុរសស្រឡាញ់បុរសនេះត្រូវបានគេមើឃើញថា បានកើតមាននៅស្ទើរគ្រប់ទីកន្លែង ដូចជានៅតាមផ្ទះ សាលារៀន សហគមន៍ កន្លែងធ្វើការ មន្ទីរពេទ្យ ភោជនីយដ្ឋាន ទីផ្សារ និងទីសាធារណៈ ហើយសូម្បីតែនៅទីអារាមក៏មាន ដោយសារតែការស្លៀកពាក់ ការនិយាយស្តី និងអកប្បកិរិយារបស់ពួកគេ។
ការរើសអើងនៅឯផ្ទះរបស់ខ្លួនពីសំណាក់សមាជិកគ្រួសាពិតជាមានការឈឺចាប់បំផុតសម្រាប់បុរសស្រឡាញ់បុរស ហើយពួកគេខ្លះត្រូវបានសមាជិកគ្រួសារបណ្តេញចេញពីផ្ទះ និងរស់នៅឯកោ។ នៅឯខាងក្រៅផ្ទះ ពួកគេត្រូវបានមិត្តភក្កិចំអកឡកលើយនៅឯសាលារៀន មិនត្រូវបានគេយកចិត្តទុកដាក់នៅឯមណ្ឌលសុខភាព ត្រូវបាននគរបាលធ្វើទុក្ខបុកម្នេញ ហើយពេលខ្លះទៀត មិនត្រូវបានគេអនុញាតិឲ្យចូលក្នុងក្រុមការងារសង្គមទៀតផង ខណៈដែលបុរសស្រឡាញ់បុរសខ្លះក៏រើសអើងបុរសស្រឡាញ់បុរសគ្នាឯងដែរ។
លោក ជួប សុខចំរើន បានលើកឡើងថា ដោយសារតែការមាក់ងាយ ការរើសអើង និងការដាក់ដល់ក្រុមបុរសស្រឡាញ់បរុស ហើយដាក់ពួកគេឲ្យនៅឯកោនៅក្នុងសង្គម នោះនាំឲ្យពួកគេលាក់មុខខ្មាស់អៀន ដោយមិនហ៊ានចេញទៅទទួលការអប់រំស្តីពីសុខភាពបន្តពូជ និងសុខភាពផ្លូវភេទទាក់ទិននឹងបុរសស្រឡាញ់បុរសឡើយ ដែលប្រការនេះនាំឲ្យពួកគេអាចប្រឈមនឹងបញ្ហាសុខភាព ដូចជាជំងឺអេដស៍ កាមរោគ និងជំងឺផ្សេងៗទៀត។
លោក សុខចំរើន បានបញ្ជាក់ថា ដោយមើលឃើញពីការប្រឈមមុខខ្ពស់បែបនេះ ទើបសហគមន៍ផ្តល់ជំនួយ ពិសេសទីភ្នាក់ងារ USAID បានជួយកាំទ្រក្នុងការទប់ស្កាត់ការមាក់ងាយនិងការរើសអើងដល់ក្រុមគោលដៅនេះ ហើយធ្វើឲ្យពួកគេទទួលបានសេវាអបរំ សេវាសុខភាព និងសេវាសង្គមផ្សេងៗបានស្មើៗគ្នាដូចពលរដ្ឋទូទៅដែរ ព្រោះនេះជាសិទ្ធិមនុស្ស ដោយសកម្មភាពទាំងនេះគឺស្របទៅនឹងគោលនយោបាយនៃរដ្ឋាភិបាលរបស់លោក បារ៉ាក់ អូបាម៉ា។
ទន្ទឹមនឹងការអំពាវនាវឲ្យបញ្ឈប់ការមាក់ងាយនិងការរើសអើងដល់បុរសស្រឡាញ់បុរសទាំងក្រុមសក់វែង និងក្រុមសក់ខ្លី លោក សុខចំរើន បានទទូចដល់ក្រុមនេះមានសេចក្តីក្លាហានហ៊ានចេញមុខ មកទទួលសេវាសុខភាព និងសេវាសង្គមផ្សេងៗទៀត ហើយធ្វើខ្លួនឲ្យមានប្រយោជន៍ដល់សង្គមគ្រួសារ និងសង្គមជាតិទាំងមូល។ អត្ថបទនេះផលិតឡើងក្រោមជំនួយសប្បុរសធម៌ពីប្រជាជនអាមេរិក តាមរយៈ USAID។ រាល់ខ្លឹមសារដែលមានក្នុងអត្ថបទនេះគឺជាការទទួលខុសត្រូវរបស់ អង្គការខាណា និងមិនបានឆ្លុះបញ្ចាំងទស្សនៈរបស់ USAID ឬរដ្ឋាភិបាលអាមេរិកឡើយ៕
