កម្ពុជាទទួលរងឥទ្ធិពលព្យុះសូណាមូរយៈពេលពីរទៅបីថ្ងៃទៀត
ភ្នំពេញ៖ ព្យុះសូណាមូ មានឥទ្ធិពលដល់កម្ពុជា រយៈពេលពីរទៅបីថ្ងៃទៀត ដោយធ្វើឲ្យផ្ទៃមេឃ មិនស្រឡះ គ្មានកម្តៅថ្ងៃ និង មានភ្លៀងធ្លាក់តិចតួចនៅតំបន់មាត់សមុទ្រ អាកាសធាតុ ចុះត្រជាក់ជាងពេលនេះបន្តិចទៀត សម្រាប់តំបន់ភ្នំ។
ថ្ងៃទី៧ មករា ២០១៣ អ្នកនាំពាក្យនិងជានាយកខុទ្ទល័យក្រសួងធនធានទឹក និងឧតុនិយម លោក ចាន់ យុត្ថា បានឲ្យដឹងថា ចាប់ពីថ្ងៃទី៩ ខែមករា ទៅអាចនឹងមានភ្លៀងធ្លាក់បន្តិចបន្ទួចជាបន្តបន្ទាប់ នៅខេត្តកំពត ខេត្តព្រះសីហនុ បន្ទាប់ពីព្យុះទីមួយឈ្មោះសូណាមូ (SONAMU) បានវិវឌ្ឍទៅជាវិសម្ពាធវិញ នៅពេលដំណើររបស់វាបានទៅដល់ប្រទេសម៉ាឡេស៊ី នាថ្ងៃទី៨ ខែមករា។
លោក ចាន់ យុត្ថា បន្តថា នៅក្រោយពេលព្យុះទីមួយនេះបានរលាយ អាកាសធាតុអាចត្រជាក់ជាងពេលនេះបន្តិចទៀត សម្រាប់នៅតំបន់ភ្នំ តែតំបន់ទំនាប សីតុណ្ហភាពមិនចុះត្រជាក់ជាងពេលនេះទៀតទេ។ ព្យុះនេះបានធ្វើឲ្យផ្ទៃមេឃនៅទូទាំងព្រះរាជាណាចក្រកម្ពុជាមិនស្រឡះ គ្មានកម្តៅថ្ងៃ និងមានភ្លៀងធ្លាក់តិចតួចជាពិសេសនៅតំបន់មាត់សមុទ្រ៕