អ្នកជំងឺនៅឥណ្ឌាត្រូវពេទ្យយកទៅធ្វើពិសោធន៍វេជ្ជសាស្ត្រ
នៅថ្ងៃព្រហស្បតិ៍នេះ តុលាការកំពូលឥណ្ឌា បានចេញយោបល់ថា ការដែលយក អ្នកជំងឺ ទៅធ្វើពិសោធន៍វេជ្ជសាស្ត្រមិនត្រឹមត្រូវតាមបទបញ្ជា នឹងបង្កជាមហន្តរាយដល់មនុស្សលោក ហើយ បានដាក់បញ្ជាអោយក្រសួងសុខាភិបាល ត្រួតពិនិត្យឡើងវិញ នូវរាល់សំណើថ្មីៗរបស់ក្រុមហ៊ុនផលិតឧសថ នៅក្នុងប្រទេស ។តុលាការឥណ្ឌាបានលើកយោបល់នេះឡើងនៅក្នុងសវនាកា ពិនិត្យលើបណ្តឹង មួយចោទថាមានមន្ទីព្យាបាលជាច្រើនយកអ្នកជំងឺទៅពិសោធន៍ដោយគ្មាន ការយល់ព្រមពីសាម៉ីខ្លួន បណ្តាលអោយមានបញ្ហា និងមានអ្នកជំងឺស្លាប់ច្រើននាក់។ យោងតាមសមាគមការពារសិទ្ធិមនុស្សជាច្រើន ឥណ្ឌាជាប្រទេសទាក់ ទាញមួយ សំរាប់គ្រប់ជាតិសាសន៍ដែលមានបំណង ធ្វើការពិសោធន៍ព្យាបាលរោគ ដោយសារតែ ការចាយវាយមានតំលៃថោក ជាងនៅបច្ចិមប្រទេស។
“ការដែលយកអ្នកជំងឺ ទៅធ្វើពិសោធន៍វេជ្ជសាស្ត្រ តំរូវអោយមានការយល់ព្រមពីច្បាប់ និងក្រមសីលធម៌ជាមុនសិន។ រហូតមកដល់ពេលនេះ រដ្ឋាភិបាលឥណ្ឌា មិនទាន់បានធ្វើអ្វីធុំដុំទាក់ទងនឹងបញ្ហានេះនៅឡើយ “ នេះជាសំដីរបស់ចៅក្រមតុលាការកំពូលឥណ្ឌា លោក ឡូដដា នៅក្នុងសវនាកា ពិនិត្យលើបណ្តឹងមួយ ដែល ចោទថា មានមន្ទីព្យាបាលជាច្រើន យកអ្នកជំងឺទៅពិសោធន៍ ដោយគ្មានការយល់ព្រមពីសាម៉ីខ្លួន ធ្វើអោយមានអ្នកជំងឺស្លាប់ច្រើននាក់។
យោងតាមការតវ៉ាប្តឹងរបស់ក្រុមគ្រូពេទ្យ និងអង្គការក្រៅរដ្ឋាភិបាលមួយ អ្នកជំងឺជាច្រើន ដែលមកទទួលការព្យាបាលនៅ Madhya Pradesh ស្ថិតនៅភាគកណ្តាលប្រទេស បានរងគ្រោះក្លាយជាចំណីនៃការពិសោធន៍ អោយប្រើប្រាស់ថ្នាំពេទ្យ។
ក្នុងរបាយការណ៍បណ្តឹង មានអ្នកជំងឺជាង ២០០ករណី រងគ្រោះដោយគ្រូពេទ្យមិនបានសុំពិសោធន៍អ្វីទាំងអស់មុនការ ព្យាបាល។
នេះមិនមែនជាលើកទីមួយទេ ដែលមានការតវ៉ាប្តឹងផ្តល់ទាក់ទងឪសថសាស្ត្រ នៅឥណ្ឌា។
កាលពីដើមឆ្នាំ ២០១២ យោងតាមការស៊ើបអង្កេតរបស់សភា អ្នកទទួលខុសត្រូវក្នុងអង្គការទទួលបន្ទុកក្បួនច្បាប់ឪសថសាស្ត្រ ជាច្រើននាក់បានរំលោភបំពានលើបទបញ្ជាទាក់ទងរបៀបរៀបរយ។ថ្នាំមួយចំនួនត្រូវបានអង្គការ ទទួលបន្ទុក ក្បួនច្បាប់ឪសថសាស្ត្រ អនុញ្ញាតអោយដាក់ប្រើ ដោយមិនបានឆ្លងកាត់ការសិក្សាពិសោធន៍ជាមុនសិន ក្នុងនោះក៏មានថ្នាំដែលប្រទេសខ្លះ បានហាម ឃាត់ ផងដែរ។
ឆ្នាំ២០១២ កន្លងមក តុលាការបានកាត់ទោស គ្រូពេទ្យ១២នាក់ អោយបង់ថ្លៃសំណងត្រឹមតែ ៧២អឺរ៉ូ ប៉ុណ្ណោះ ក្នុងសំណុំរឿងយកកុមារឥណ្ឌា និងអ្នកជំងឺមួយចំនួនធ្វើពិសោធន៍វេជ្ជសាស្ត្រដោយលាក់លាម៕
ដោយ ព្រំសឿនសូលីណា (RFI)