ជិះម៉ូតូជ្រុលទៅបុករថយន្តបាក់ធ្មេញអស់៣
ភ្នំពេញ ៖ កាលពីវេលាម៉ោង៤ និង៣០ នាទីរសៀលថ្ងៃទី៣ មករា ក្មេងស្រីជំទង់ម្នាក់ខ្ចីម៉ូតូមិត្តភក្តិជិះដើរលេង ជ្រុលទៅបុករថយន្តចំហៀងខាងឆ្វេង បណ្តាលឲ្យដួលបោកនឹងទ្វាររថយន្តរងរបួស បាក់ធ្មេញ អស់៣ ហូរឈាមកក្លាក់ ស្ថិតនៅគល់ស្ពានភ្លោះកោះពេជ្រថ្មី តាមមហាវិថីព្រះសីហនុកែងវិថីមហាឧបាសក ស ប៊ិត ក្នុងសង្កាត់ទន្លេបាសាក់ ខណ្ឌចំការមន ។
សាក្សីឃើញហេតុការណ៍បានឲ្យដឹងថា មុនពេលកើតហេតុ រថយន្ត និងម៉ូតូជិះលឿនដូចគ្នា បណ្តាលឲ្យបុកគ្នា ក្នុងនោះរថយន្តម៉ាកឡិចស៊ីស ពណ៌ស ជិះគ្នា២នាក់ ជាស្រ្តី បើកតាមវិថី ឧបាសក ស ប៊ិត ពីជើងទៅត្បូង ចំណែកម៉ូតូម៉ាក HAYATE ពណ៌ខ្មៅ ជិះគ្នា២នាក់ ក្មេងស្រីជំទង់ឌុបក្មេងប្រុសជំទង់ តាមមហាវិថីព្រះសីហនុ ពីលិចទៅកើត ខណៈមកដល់ចំណុចខាងលើ ជាចំណុចប្រសព្វ ធ្វើឲ្យម៉ូតូចាប់ហ្វ្រាំងមិនទាន់ ជ្រុល ទៅបុករថយន្តចំទ្វារក្រោយចំហៀងខាងឆ្វេង បណ្តាលឲ្យក្មេងស្រីជាអ្នកបើកម៉ូតូដួលបោកទ្វាររថយន្តបាក់ធ្មេញ៣ រីឯយុវជនជំទង់ជិះពីខាងក្រោយមិនមានរងរបួសទេ ។
ក្រោយពេលកើតហេតុ មិត្តភក្តិបានដឹកតាមម៉ូតូយកទៅព្យាបាលនៅគ្លីនិកជិតកន្លែងកើតហេតុ រួចមិត្តភក្តិបានទូរស័ព្ទហៅសាច់ញាតិមកដោះស្រាយនៅកន្លែងកើតហេតុ ដោយសងការខូចខាត ទៅម្ចាស់រថយន្តនោះ ។ ចំណែកម៉ូតូដែលខ្ចីមិត្តភក្តិជិះនោះ ខូចខាតផ្នែកខាងមុខខ្ទេច៕