អ្នកភូមិបុរីកីឡាព្រមានចូលទៅនៅអគារសង់ថ្មីបើនៅតែពុំមានដំណោះស្រាយ
នៅថ្ងៃទី១៦ កុម្ភៈ ២០១២ អ្នកភូមិបុរីកីឡាជាង ១០០គ្រួសារដែលកំពុងរស់នៅក្រោមអគារទី៧ ក្នុងប្លុកបុរីកីឡាបានប្រកាសថា ពួកគេនឹងចូលទៅរស់ក្នុងអគារសង់ថ្មីចំនួន២ របស់ក្រុមហ៊ុនផានអ៊ីម៉ិច ប្រសិនបើក្រុមហ៊ុននៅតែមិនដោះស្រាយបញ្ហារបស់ពួកគេ។
ការប្រកាសនេះធ្វើឡើងនៅក្នុងសន្និសីទសារព័ត៌មានរបស់ប្លុកបុរីកីឡា នៅខាងមុខអគារទី៨ ខណ្ឌ៧មករា។ ហើយអ្នកភូមិបុរីកីឡាបានបន្តថា ក្នុងរយៈពេល ៧ថ្ងៃពួកគេទាំងជាង ១០០គ្រួសារ នឹងចូលទៅរស់នៅអគារសង់ថ្មីចំនួនពីររបស់ក្រុមហ៊ុនផានអ៊ីម៉ិច ដែលសាងសង់រួច។
អ្នកស្រី កែវ សាកល ដែលជាចៅសង្កាត់វាលវង់បាននិយាយនៅព្រឹកថ្ងៃព្រហស្បតិ៍ ទី១៦ កុម្ភៈ ថា អ្នកស្រីចង់អោយអ្នកភូមិ និងភាគីក្រុមហ៊ុនពិភាក្សាគ្នា ដោះស្រាយបញ្ហាទាំងអស់នេះដោយសន្តិវិធី៕
