ម៉ូតូពីរគ្រឿងបុកគ្នារងរបួសធ្ងន់ ២នាក់ស្រាល ២នាក់
ភ្នំពេញ ៖ កាលពីវេលាម៉ោង១និង១០នាទីរំលងអធ្រាត្រឈានចូលថ្ងៃទី២ ខែមករា ម៉ូតូសង់កូរ៉េ ពណ៌ក្រហម ដឹកនំប៉ាវលក់ ជិះទៅបុកម៉ូតូគុបជ្រុង៥០ ពណ៌ស្លែ ជិះគ្នា២នាក់ ជាស្រ្តី បណ្តាលឲ្យដួលរងរបួសធ្ងន់ ២នាក់ ស្រាលម្នាក់ ស្ថិតនៅចំណុចខាងត្បូងមន្ទីរ ពេទ្យមិត្តភាពខ្មែរសូវៀត តាមផ្លូវលេខ២៧១ មុខផ្ទះលេខ៤០២ សង្កាត់ទំនប់ទឹក ខណ្ឌចំការមន។
សាក្សីឃើញហេតុការណ៍បានឲ្យដឹងថា មុនពេលកើតហេតុ ម៉ូតូសង់កូរ៉េ ពណ៌ក្រហម ដឹកនាំប៉ាវដើរលក់ ក្នុងទិសដៅពីជើងទៅត្បូង ចំណែកម៉ូតូគុបជ្រុង៥០ ពណ៌ស្លែ ជិះគ្នា២នាក់ ជាស្រ្តី ជិះពីត្បូងទៅជើង ខណៈមកដល់ចំណុចខាងលើ បានបត់ឆ្វេង បណ្តាលឲ្យម៉ូតូលក់នំប៉ាវបុកចំពាក់កណ្តាលម៉ូតូដួល រងរបួសធ្ងន់អ្នកបើកម៉ូតូទាំងពីរគ្រឿង ចំណែកអ្នក ជិះពីក្រោយរងរបួសស្រាល ។
ក្រោយពេលកើតហេតុ ជនរងគ្រោះ ត្រូវបានបញ្ជូនទៅព្យាបាលនៅមន្ទីរពេទ្យ មិត្តភាព ខ្មែរសូវៀត ។ ចំណែកម៉ូតូទាំងពីរគ្រឿង ត្រូវសមត្ថកិច្ចធ្វើការវាស់វែងយកទៅរក្សាទុក នៅ ខណ្ឌចំការមន រង់ចាំធ្វើការដោះស្រាយតាមនីតិវិធី ៕
ដោយ៖ ហេង នាង