ម៉ូតូពីរគ្រឿងបុកគ្នាបណ្ដាលឲ្យរងរបួសធ្ងន់ធ្ងរពីរនាក់
ភ្នំពេញ ៖ កាលពីវេលាម៉ោង ២១ និង ២៥នាទីយប់ ថ្ងៃទី០១ ខែធ្នូ បុរសពីរនាក់បានរងរបួសធ្ងន់ធ្ងរក្នុងខណៈដែលពួកគេជិះម៉ូតូពីរ គ្រឿងក្នុងល្បឿនលឿន ហើយបុកគ្នាពេញទំហឹង ស្ថិតនៅតាមបណ្ដោយមហាវិថីព្រះសីហនុ កែងផ្លូវលេខ ៥១ ក្នុងសង្កាត់បឹងកេងកងទី ១ ខណ្ឌចំការមន ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេសង្កេតបុរសម្នាក់វ័យជាង ២០ ឆ្នាំបានជិះម៉ូតូមួយគ្រឿងម៉ាកសេ ១១០ ពណ៌ខ្មៅ បើកបរយ៉ាងលឿនតាមផ្លូវលេខ៥១ ក្នុងទិសដៅពីជើងទៅត្បូង ខណៈជិះមកដល់ចំណុចកែងផ្លូវព្រះសីហនុ ស្រាប់តែមានម៉ូតូ CD មួយគ្រឿង ពណ៌ខ្មៅ ដែលបើកបរដោយយុវជនម្នាក់ តាមបណ្ដោយផ្លូវព្រះសីហនុ ពីលិចទៅកើតក្នុងល្បឿនលឿនដូចគ្នា លុះដល់ផ្លូវកែងពួកគេមិនបានបន្ថយល្បឿនស្រាប់តែម៉ូតូទាំងពីរគ្រឿង បុកគ្នាពេញទំហឹងបណ្ដាលឲ្យអ្នកបើកម៉ូតូទាំងពីរគ្រឿងត្រូវរងរបួសធ្ងន់ធ្ងរ។
ក្រោយពេលកើតហេតុម្ចាស់ម៉ូតូទាំងពីរគ្រឿង ត្រូវរថយន្តសាម៉ុយដឹកយកទៅសង្គ្រោះនៅមន្ទីរពេទ្យនានាជិតចំណុច កើតហេតុ ។ ចំណែកម៉ូតូទាំងពីរគ្រឿងទៅ រក្សាទុកនៅអធិការដ្ឋាននគរបាលខណ្ឌចំការមនដើម្បីរងចាំការដោះស្រាយ តាមផ្លូវច្បាប់៕
ដោយ៖ ហេង នាង
