ជិះម៉ូតូលឿនមិនប្រយ័ត្នបុកគ្នាបណ្ដាលឲ្យរបួសប្រាំនាក់
ភ្នំពេញ៖ កាលពីវេលាម៉ោង១៥និង៤៥នាទីថ្ងៃទី២៨ ខែធ្នូ សិស្សសាលាប្រាំនាក់បានរង របួសស្រាលដែលបង្កឡើងដោយម៉ូតូ ពីរគ្រឿងបុកគ្នាពេញទំហឹង នៅតាមបណ្ដោយមហាវិថីព្រះសីហនុកែងនិងវិថីមហាឧបាសកសប៊ិតជិតណាហ្គា វើល ស្ថិត ក្នុងសង្កាត់ទន្លេបាសាក់ ខណ្ឌចំការមន។
មុនពេលកើតហេតុគេឃើញយុវជនសិស្សសាលាពីរនាក់ជិះម៉ូតូមួយ គ្រឿងម៉ាកសេ១១០ ស៊េរី២០១២ ពណ៌ខ្មៅពាក់ស្លាកលេខភ្នំពេញ 1BP8461 តាមបណ្ដោយវិថីព្រះសីហនុ ទិសដៅពីលិច ទៅកើតក្នុងល្បឿនលឿនលុះពេលបើកមកដល់ចំណុចផ្លូវ កែងជមួយនិងវិថីមហាឧបាសកសប៊ិត ក៏បុកជាមួយ និងម៉ូតូមួយ គ្រឿងទៀតម៉ាកស្គូពីពណ៌ស លាយផ្កាឈូក ពាក់ស្លាកលេខភ្នំពេញ1BG2834 ដែលបើកបរដោយយុវតីបី នាក់ ក្នុងល្បឿនយ៉ាងលឿនក្នុង ទិសដៅពីត្បូងទៅជើង ក៏បានបុកគ្នាយ៉ាងពេញទំហឹងបណ្ដាលឲ្យម៉ូតូទាំងពីរគ្រឿងដួលរង ការខូចខាតតិចតួច ចំណែកមនុស្សបានរងរបួសស្រាលប្រាំនាក់ ។
ក្រោយពេលកើតហេតុម៉ូតូនិងអ្នករបួសត្រូវ បានបញ្ជូន ទៅមន្ទីរពេទ្យព្យាបាលរបួស ចំណែកម៉ូតូទាំងពីរគ្រឿងត្រូវ បានសមត្ថកិច្ចមូលដ្ឋានចុះធ្វើការវាស់វែងដកហូតយក ទៅរក្សាទុកនៅអធិការដ្ឋាននគរបាលខណ្ឌ ចំការមនដើម្បីដោះស្រាយតាមច្បាប់៕
ដោយ៖ ហេង នាង
