បុរស ៥នាក់ ស្រវឹងស្រាទៅទាត់ធាក់ទ្វារផ្ទះប្រជាពលរដ្ឋ
ភ្នំពេញ ៖ កាលពីវេលាម៉ោង ១១ និង៣០នាទីយប់ថ្ងៃទី២៧ ធ្នូ បុរស ៥នាក់ សុទ្ធតែស្រវឹងស្រា ដើរទេ្រតទ្រោត ទៅគាស់ទ្វារផ្ទះរបស់ប្រជាពលរដ្ឋទាំងយប់ មិនព្រមបើកទ្វារឲ្យបានទាត់ធាក់ទ្វារផ្ទះគេ ហើយស្រែកគំរាមរកបាញ់ទៀត ធ្វើឲ្យម្ចាស់ផ្ទះទូរស័ព្ទប្តឹងសមត្ថកិច្ចចុះទៅឃាត់ខ្លួនភ្លាមៗ តែម្តង ស្ថិតនៅចំណុចភូមិត្រពាំងឈូក ទល់មុខមន្ទីរពេទ្យព្រះកុសុមៈ ក្នុង សង្កាត់ទឹកថ្លា ខណ្ឌសែនសុខ ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ បុរស៥នាក់ សុទ្ធតែ ស្រវឹងស្រា បានចូលទៅក្នុងភូមិត្រពាំងឈូក ហើយបានគាស់ផ្ទះប្រជាពលរដ្ឋឲ្យបើក តែម្ចាស់ផ្ទះមិនព្រមបើកទ្វារឲ្យ ស្រាប់តែបុរសទាំង៥ នាក់នោះ បានទាត់ធាក់ទ្វារ ហើយស្រែក គំរាមរកបាញ់ម្ចាស់ផ្ទះទៀត តែអ្នកទាំង៥ នាក់នោះ មិនមានកាំភ្លើងទេ ។
ពេលដែលបង្កការរំខានដល់ម្ចាស់ផ្ទះទាំងយប់បែបនេះ ម្ចាស់ផ្ទះបានទូរស័ព្ទទៅប្តឹងសមត្ថ កិច្ច ចុះទៅឃាត់ខ្លួនបុរសទាំង ៥នាក់នោះ នៅកន្លែងកើតហេតុយកទៅសាកសួរនៅអធិការដ្ឋានខណ្ឌសែនសុខ ទាំងយប់តែម្តង ៕
ដោយ៖ ហេង នាង
