ជនសង្ស័យលួចវះកាបូបលុយអ្នករត់រ៉ឺម៉កម៉ូតូត្រូវម្ចាស់ចាប់ក្របួចបានភ្លាមៗ
ភ្នំពេញ ៖ កាលពីវេលាម៉ោង២និង៣០ នាទីរំលងអធ្រាត្រឈានចូលថ្ងៃទី២៧ ធ្នូ ជនសង្ស័យជំនាញខាងវះកាបូបលុយម្នាក់អស់លក្ខណ៍ ខណៈពេលលួចវះហោប៉ៅខោរបស់អ្នករត់រ៉ឺម៉កម៉ូតូ ដែលកំពុងតែដេកលង់លក់ នៅលើរ៉ឺម៉ក ត្រូវបានអ្នកជិតខាងស្រែកផ្អើលឆោឡោ រត់ចាប់ខ្លួនបាន ស្ថិតនៅមុខ សណ្ឋាគារហូលីដេ តាមផ្លូវលេខ៨៦ កែងមហាវិថី ព្រះមុនីវង្ស ក្នុងសង្កាត់ ស្រះចក ខណ្ឌដូនពេញ ។
ជនរងគ្រោះ ជាអ្នករត់រ៉ឺម៉កម៉ូតូមានឈ្មោះ អៀង សំរេច ភេទប្រុស អាយុ ២៥ឆ្នាំ មានទីលំនៅភូមិដើមស្លែង សង្កាត់ច្បារអំពៅទី២ ខណ្ឌមានជ័យ បានឲ្យដឹងថា មុនពេលកើតហេតុ គាត់រ៉ឺម៉កម៉ូតូនៅជិតចំណុចខាងលើ ពេលដែលអត់មានភ្ញៀវ បានដេកលង់លក់នៅលើរ៉ឺម៉កម៉ូតូនោះ ស្រាប់តែជនសង្ស័យម្នាក់ បានដើរមកធ្វើសកម្មភាពវះហោប៉ៅខោរបស់គាត់ លួចយកកាបូបលុយ ។
ពេលកំពុងតែធ្វើសកម្មភាព ស្រាប់តែអ្នកលក់ទឹកក្រឡុក នៅជិតកន្លែងកើតហេតុ ឃើញទាន់បានស្រែកផ្អើលឆោឡោ ធ្វើឲ្យគាត់ភ្ញាក់ដឹងខ្លួន ជនសង្ស័យភ័យពេក បានបោះកាបូបលុយនោះ ទៅក្នុងរ៉ឺម៉កម៉ូតូវិញ ហើយរត់គេចខ្លួន ត្រូវម្ចាស់កាបូបអ្នករត់ម៉ូតូឌុប និងសន្តិសុខនៅជិតកន្លែងកើតហេតុនោះ នាំគ្នារត់ដេញតាមចាប់ ជនសង្ស័យបានភ្លាមៗតែម្តង៕
ដោយ៖ ហេង នាង
