បុរសម្នាក់ត្រូវក្រុមចោរបាញ់ប្លន់យកម៉ូតូបានសម្រេច
ភ្នំពេញ៖ កាលពីវេលាម៉ោង ២៣ និង ១៥ នាទីយប់ថ្ងៃទី ២៥ ខែធ្នូ ឆ្នាំ បុរសម្នាក់បានរងរបួសធ្ងន់ធ្ងរ ក្នុងអំពើបាញ់ប្រហារប្លន់យកម៉ូតូម៉ាកសេ ១២៥ ស៊េរី ឆ្នាំ ២០១៣ មួយគ្រឿង នៅចំណុចមុខហាងម៉ាស្សាយីហោ អញ្ចលីស្ប៉ា ស្ថិតនៅតាមបណ្តោយផ្លូវលេខ ៣១០ សង្កាត់បឹងកេងកងទី ១ ខណ្ឌចំការមន។
បុរសរងគ្រោះក្នុងអំពើបាញ់ប្រហារខាងលើឈ្មោះ ចិន សុធា អាយុ ៣១ ឆ្នាំ មានទីលំនៅសង្កាត់បឹងទំពុន ខណ្ឌមានជ័យ ។
ប្រភពព័ត៌មានបានឲ្យ ដឹងថា មុនពេលកើតហេតុ បុរសរងគ្រោះបានជិះម៉ូតូម៉ាកសេ ១២៥ ពណ៌ខ្មៅ ស៊េរី ឆ្នាំ២០១៣ ឌុបប្រពន្ធត្រឡប់មកពីទទួលទៀនអាហារនៅខាងក្រៅ ក្នុងគោលបំណងយកប្រពន្ធមកដាក់នៅកន្លែងធ្វើការនៅក្នុងហាងម៉ាស្សា អញ្ចលីស្ប៉ា ពេលមកដល់មុខហាងបុរសរងគ្រោះបានឈប់ម៉ូតូ ខណៈនោះស្រាប់តែមានជនប្រដាប់អាវុធពីរនាក់ស្លៀកពាក់ស៊ីវិលហើយមាន ពាក់មួកសុវត្ថិភាពមកឈប់ទទឹម រួចដកអាវុធខ្លីធ្វើសកម្មភាពបាញ់ប្រហារប្លន់យកម៉ូតូពីបុរសរងគ្រោះ ចំនួន បួនគ្រាប់បណ្តាលឲ្យរងរបួសហើយក្រុមចោរប្លន់ដណ្តើមយកម៉ូតូជិះគេច បាត់ភ្លាមៗតែម្តង។
ក្រោយពេលកើតហេតុភ្លាមៗបុរសរងគ្រោះត្រូវបានស្ត្រីជាប្រពន្ធនិង បុគ្គលិកក្នុងហាងអញ្ចលីស្ប៉ា លើកយកចូលក្នុងគ្លីនិក មេគង្គ ប៉ុន្តែដោយសារស្ថានភាពមុខរបួសមានលក្ខណៈធ្ងន់ធ្ងរ ក្រុមគ្រូពេទ្យក្នុងគ្លីនិក មេគង្គ បានបញ្ជូនទៅព្យាបាលនៅមន្ទីរពេទ្យ មិត្តភាពខ្មែរសូវៀតបន្ត ។
តាមការពិនិត្យជាក់ស្តែងដោយមន្ត្រីសមត្ថកិច្ចនគរបាលមូលដ្ឋាននិង គ្រូពេទ្យបានឲ្យដឹងថា បុរសរងគ្រោះត្រូវរបួសដោយគ្រាប់កាំភ្លើងចំនួន ពីរគ្រាប់ មួយគ្រាប់ចំភ្លៅខាងឆ្វេង និងមួយគ្រាប់ទៀតត្រូវចំពងស្វាសខាងឆ្វេងពៀនគ្រាប់រងរបួសជាទម្ងន់ ៕
ដោយ៖ ហេង នាង
