រថយន្តមួយគ្រឿងបុកបុរសបីនាក់រងរបួសធ្ងន់
ភ្នំពេញ ៖ កាលពីវេលាម៉ោង ១៣ និង ០០ នាទី រសៀលថ្ងៃទី ២៥ ខែធ្នូ រថយន្តមួយគ្រឿង បើកបុកដាច់ដើមឈើមួយដើមរួចទៅបុករៈ ម៉ូតូពីរគ្រឿងនិងអ្នកដើរតាមដងផ្លូវបណ្ដាលឲ្យបុរសបីនាក់បាន រងរបួស ធ្ងន់ នៅតាមបណ្ដោយវិថីព្រះស៊ីសុវត្តិ ស្ថិតក្នុង សង្កាត់ចតុមុខ ខណ្ឌដូនពេញ ។
សាក្សីនៅកន្លែង កើតហេតុបានឲ្យដឹងថា មុនពេលកើតហេតុគេឃើញបុរសម្នាក់ឈ្មោះ ម៉ី ទីតា ភេទប្រុស អាយុ ២០ ឆ្នាំ ស្នាក់នៅផ្ទះ លេខ ១៩៣៩ ផ្លូវជាតិលេខ ២ សង្កាត់ចាក់អង្រែលើ ខណ្ឌមានជ័យ បើកបររថយន្តម៉ាក visto ពណ៌ស ពាក់ស្លាកលេខ ភ្នំពេញ 2U 9661 តាមបណ្តោយវិថីព្រះស៊ីសុវត្តិក្នុងទិសដៅពីត្បូងទៅជើង ក្នុងល្បឿន លឿន លុះមកដល់ចំណុចកើតហេតុ ម្ចាស់រថយន្តបានប្រាប់ទូរស័ព្ទ ជ្រុះហើយអោនរើសទូរស័ព្ទ ពេលនោះក៏ជ្រុលល្បឿន ទៅបុកដើមឈើមួយដើមរួចជ្រុលទៅបុកម៉ូតូមួយគ្រឿង ម៉ាកសេ ១២៥ បើកបរដោយបុរសម្នាក់ឈ្មោះ សុន វុទ្ធី ដែលស្របទិសគ្នា បណ្ដាលឲ្យបាកដៃខាងស្តាំ ហើយរថយន្តមិនទាន់អស់ល្បឿនក៏ជ្រុលទៅបុកម៉ូតូមួយគ្រឿងទៀត ដែលកំពុងបើកបរស្របទិសគ្នាជាមួយរថយន្តបង្កហេតុ បណ្ដាលឲ្យម្ចាស់ម៉ូតូរងរបួសធ្ងន់ធ្ងរ បន្ទាប់មកបានបន្តទៅបុកឈ្មោះ ស្រុន ម្នាក់ដែលកំពុងដើរនៅពីមុខរថយន្តពេញទំហឹងតែម្តង បណ្ដាលឲ្យរងរបួសធ្ងន់ធ្ងរ ។
ក្រោយពេលកើតហេតុបុរសរងគ្រោះទាំងបីនាក់ខាងលើ ត្រូវដឹកតាមរថយន្តយកទៅសង្គ្រោះ នៅមន្ទីរពេទ្យចំណែកម៉ូតូ ២គ្រឿង និងរថយន្តបង្កហេតុ ត្រូវបានសមត្ថកិច្ច មូលដ្ឋានសហការជាមួយប៉ូលិសជំនាញចុះវាស់វែងយកទៅរក្សាទុកនៅ ការិយាល័យចរាចរណ៍ជើងគោករាជធានីភ្នំពេញ ដើម្បីរងចាំដោះស្រាយតាមច្បាប់៕
ដោយ៖ ហេង នាង
