កម្ពុជាកំពុងរៀបចំយុទ្ធសាស្ត្រទប់ស្កាត់វិបត្តិបំណុលធ្ងន់ធ្ងរ
កន្លងមកលោកនាយករដ្ឋមន្ត្រី ហ៊ុន សែន ធ្លាប់បាននិយាយថា លោកនឹងមិនបណ្ដែតបណ្ដោយឲ្យកម្ពុជា ធ្លាក់ចូលក្នុងវិបត្តិធ្ងន់ធ្ងរនៃការជំពាក់បំណុលគេវ័ណ្ឌកនោះទេ។
នៅថ្ងៃទី ១០ កុម្ភៈ ២០១២ ទីស្ដីការគណៈរដ្ឋមន្ត្រី បានសេចក្ដីប្រកាសព័ត៌មានបញ្ជាក់អំពីវិធានការទប់ស្កាត់ការជំពាក់បំណុលគេវ័ណ្ឌកមួយចំនួនដូចជា ១- ត្រូវខ្ចីឥណទានសម្រាប់តែវិស័យអាទិភាព ដើម្បីទ្រទ្រង់កំណើន និងបង្កើតផលិតភាពសេដ្ឋកិច្ច ២- ត្រូវខ្ចីឥណទានក្នុងទំហំសមស្រប ដែលស្ថានភាពថវិកា និងសេដ្ឋកិច្ចកម្ពុជាអាចទ្រាំទ្របាន ៣- ត្រូវប្រើប្រាស់ឥណទានទាំងនោះ ប្រកបដោយតម្លាភាព និងប្រសិទ្ធភាពបំផុត។
ទាក់ទង់ទៅនឹងបញ្ហានេះលោក សុន ឆ័យ តំណាងរាស្ត្រគណបក្ស សម រង្ស៊ី បានឲ្យដឹងថា រហូតមកដល់ពេលនេះកម្ពុជា បានជំពាក់បំណុលប្រទេសចិនជាង ៣.០០០ លានដុល្លារអាមេរិក និងជំពាក់បំណុលប្រទេសមួយចំនួនទៀត សរុបទាំងអស់ជាង ៦.៥០០ លានដុល្លារអាមេរិក៕
