ខណៈកំពុងជិះម៉ូតូត្រូវរថយន្តបុកពីក្រោយបណ្តាលឲ្យបាក់ភ្លៅ
ភ្នំពេញ ៖ នៅវេលាម៉ោង១០ និង៥៥ នាទីយប់ថ្ងៃទី១៧ ធ្នូ បុរសម្នាក់ខណៈកំពុងជិះម៉ូតូ ត្រូវរថយន្តបើកបុកពីក្រោយបណ្តាលឲ្យបាក់ភ្លៅខាងឆ្វេង រថយន្តបង្កបើករត់គេចបាត់ គ្រោះថ្នាក់នេះកើតឡើង តាមមហាវិថីព្រះនរោត្តមកែង២៨៨ ក្នុងសង្កាត់បឹងរាំង ខណ្ឌដូនពេញ ។
ជនរងគ្រោះមានឈ្មោះ សាន ម៉ារិទ្ធិ ភេទប្រុស អាយុជាង ២០ឆ្នាំ ស្នាក់នៅសង្កាត់ចាក់អង្រែក្រោម ខណ្ឌមានជ័យ ។
ប្រភពព័ត៌មានបានឲ្យដឹងថា រថយន្តហាយឡែនឌ័រ ពណ៌ស្ករ បើកតាមមហាវិថីព្រះនរោត្តម ពីត្បូងទៅជើង ចំណែកម៉ូតូសេ១២៥ ស៊េរី២០០២ ពណ៌ក្រហម ជិះតាមផ្លូវលេខ២៨៨ ពីលិច ទៅកើត ខណៈមកដល់ចំណុចផ្លូវកែងរថយន្តបត់ឆ្វេងទៅបុកម៉ូតូពីក្រោយ បណ្តាលឲ្យដាច់ស្លាកលេខម៉ូតូ ចំណែកអ្នកបើកម៉ូតូដួល បាក់ភ្លៅខាងឆ្វេង រថយន្តបង្កព្យាយាមបន្ថែមល្បឿន បើករត់គេចបាត់។
ក្រោយពេលកើតហេតុជនរងគ្រោះចាំរថយន្តសង្គ្រោះរបស់មន្ទីរពេទ្យមិត្តភាពខ្មែរសូវៀត ដឹកយកទៅសង្គ្រោះ ចំណែកម៉ូតូរង់ចាំបងប្អូន ទៅទទួលយកទៅរក្សាទុក ៕
ដោយ៖ ហេង នាង
