ជនបង្ក៣នាក់ជិះម៉ូតូដេញវាយគេដល់ផ្ទះត្រូវសមត្ថកិច្ចឃាត់ខ្លួន
ភ្នំពេញ ៖ កាលពីវេលាម៉ោង ៨យប់ ថ្ងៃទី១០ ធ្នូ ជនបង្ក ៣នាក់ ជិះម៉ូតូគុបជ្រុង៥០ ពណ៌ទឹកប៊ិច ប្រដាប់ដោយបំពង់ទីបជ្រុង ធ្វើសកម្មភាពដេញវាយជនរងគ្រោះដល់មុខផ្ទះ ត្រូវជនរងគ្រោះ ស្រែកហៅបងប្អូនឲ្យជួយ ទើបជនបង្កនាំគ្នារត់ចោលម៉ូតូមួយគ្រឿងនៅកន្លែងកើតហេតុ ស្ថិតនៅតាមផ្លូវលំ ក្នុងក្រុម៩ ភូមិឬស្សី សង្កាត់ស្ទឹងមានជ័យ ខណ្ឌមានជ័យ ។
ប្រភពព័ត៌មានបានឲ្យដឹងថា ជនបង្ក៣ នាក់ ជិះម៉ូតូគុបជ្រុង៥០ ពណ៌ទឹកប៊ិច ប្រដាប់ដោយបំពង់ទីបជ្រុងគ្រប់ដៃ បានជិះដេញតាមវាយជនរងគ្រោះ២នាក់ ជិះម៉ូតូសង់កូរ៉េ ពណ៌ក្រហម ដល់មុខផ្ទះតែម្តង ខណៈពេលដែលជនរងគ្រោះបម្រុងចូលផ្ទះ ស្រាប់តែជនបង្ក បាននាំគ្នារត់ទៅដេញវាយ តែត្រូវជនរងគ្រោះរត់ចូលផ្ទះ ស្រែកហៅឲ្យបងប្អូនជួយផង ទើបជនបង្កនាំគ្នារត់ចែកផ្លូវគ្នាទុកម៉ូតូ នៅកន្លែងកើតហេតុ ។
ជនរងគ្រោះមិនបានរងរបួសទេ រត់គេចទាន់ ចំណែកម៉ូតូជនបង្ក ត្រូវប្រជាការពារភូមិយកទៅរក្សាទុក ស្រាប់តែមានជនបង្ក ២នាក់ គេចខ្លួនបាត់ម្នាក់ បានសុំយកម៉ូតូវិញ ហើយប្រាប់ថា រូបគេវាយច្រឡំមនុស្សទេ ។ ពេលប្រជាការពារភូមិឃាត់ខ្លួន ជនបង្កទាំង ២នាក់នោះ រួចប្រគល់ឲ្យកងរាជអាវុធហត្ថមានជ័យ យកទៅសាកសួរនៅខណ្ឌ ។
ជនរងគ្រោះមាន ឈ្មោះ ឡឹង វណ្ណដេត ភេទប្រុស អាយុ ៣៣ឆ្នាំ និងម្នាក់ទៀតឈ្មោះ រ៉ា ភេទ ប្រុស អាយុ ២៣ឆ្នាំ អ្នកទាំងពីរស្នាក់នៅកន្លែងកើតហេតុខាងលើ ៕
ដោយ៖ ហេង នាង