នារីម្នាក់ខណៈកំពុងបើកម៉ូតូក៏ត្រូវម៉ូតូមួយទៀតបុកពេញទំហឹងបណ្ដាលអោយរងរបួសបាក់មេជើងចេញឆ្អឹងមកក្រៅ
ភ្នំពេញ ៖ នារីម្នាក់បើកម៉ូតូមកបញ្ជាក់សញ្ញាប័ត្រនៅសាលារាជធានី ក៏ត្រូវបានម៉ូតូមួយគ្រឿងទៀតដែលបើកយ៉ាងលឿនបុកពេញទំហឹង បណ្ដាលអោយ ដួលរងរបួសបាក់មេជើងម្ខាងចេញឆ្អឹងលៀនមក ក្រៅ ។ ហេតុការណ៍គ្រោះថ្នាក់ចរាចរណ៍នេះបាន កើតឡើងកាលពីវេលាម៉ោង៩និង៣០នាទីព្រឹកថ្ងៃទី១៦ វិច្ឆិកា ២០១២ នៅចំណុចខាងមុខផ្កាយរណបខាងត្បូងសាលារាជធានីភ្នំពេញផ្លូវ មុនីវង្សក្នុងសង្កាត់ស្រះចកខណ្ឌដូនពេញ។
នារី រងគ្រោះមានឈ្មោះប៉ែន ណារ៉ែនអាយុ២៤ឆ្នាំ ជិះម៉ូតូម៉ាកC90ពណ៌ទឹកប៊ិចពាក់ស្លាកលេខភ្នំពេញ1AC-79 92 មានទីលំនៅឃុំជើងកើបស្រុកកណ្តាលស្ទឹង ខេត្តកណ្តាល។ ចំណែកភាគីម្ខាងទៀតម៉ូតូម៉ាកC125ពណ៌ខ្មៅពាក់ស្លាកលេខភ្នំពេញ1AR-40 31បើកបរ ដោយឈ្មោះឡាង សុខឡាភេទប្រុសអាយុ២៣ឆ្នាំស្នាក់នៅបូរីកីឡាសង្កាត់វាងវង់ខណ្ឌ ៧មករានិងមានស្រុកកំណើតនៅខេត្តកំពង់ចាមរងរបួសស្រាល។
សាក្សី ដែលឃើញហេតុការណ៍គ្រោះថ្នាក់នោះបានអោយដឹងថា នៅវេលាកើតហេតុគេឃើញ នារីរងគ្រោះបើកម៉ូតូតាមផ្លូវព្រះមុនីវង្សពីត្បូងមកជើងក្នុង លុះពេលមកដល់កន្លែងកើតហេតុក៏បានបើកសសៀរបត់ឆ្វេងចូលសាលារាជធានី គាប់ជួនពេលនោះមានម៉ូតូC125មួយ គ្រឿងទៀតជិះគ្នា២នាក់បើកយ៉ាងលឿនពីជើងមកត្បូងហើយកន្លែងនោះ ចង្អៀតស្ទះចរាចរផងក៏បុកគ្នាដួលទាំងអស់គ្នា បន្ទាប់មកក៏ត្រូវបានគេហៅរថយន្តសាមុយពេទ្យកាល់ម៉ែតមកដឹកយកទៅ សង្គ្រោះភ្លាមៗដែរ។ ចំណែកម៉ូតូទាំង២គ្រឿងក៏ត្រូវបានប៉ូលិសផ្នែកវាស់វែងអធិការដ្ឋាន ខណ្ឌដូនពេញយកទៅរក្សាទុករង់ចាំដោះស្រាយតាមនីតិវិធី៕
ដោយ៖ ហេង នាង
