បុរសជនជាតិវៀតណាមម្នាក់ស្រវឹងបើកម៉ូតូទៅបុកគូទរថយន្តកាមរីគូទស្វិតពេញទំហឹងបណ្តាលឱ្យដួលសន្លប់
ភ្នំពេញ ៖ កាលពីវេលាម៉ោង១០ និង៣០នាទីយប់ ថ្ងៃទី១៤ វិច្ឆិកា ២០១២ នៅចំណុចស្តុបសន្ធរម៉ុក តាមបណ្តោយមហាវិថីម៉ៅសេទុង កែងផ្លូវកម្ពុជាក្រោម ក្នុងសង្កាត់ផ្សារដេប៉ូ២ ខណ្ឌទួលគោក មានបុរសជនជាតិវៀតណាមម្នាក់បានបើកម៉ូតូទាំងក្នុងស្ថានភាពស្រវឹងជោកហើយ បត់ឆ្វេង ក៏ទៅបុកគូទរថយន្តកាមរីគូទស្វិតមួយគ្រឿងពេញទំហឹង បណ្តាលឱ្យដួលសន្លប់ ហើយត្រូវម្ចាស់រថយន្តជួយលើកដាក់ទៅលើចិញ្ចើមផ្លូវ ។
មុនពេលកើតហេតុគេឃើញបុរសជនជាតិវៀតណាមខាងលើ បានបើកម៉ូតូសង់៩៧ ពណ៌ខ្មៅ តាមបណ្តោយមហាវិថីម៉ៅសេទុងទាំងក្នុងស្ថានភាពស្រវឹងជោកពីជើង ទៅត្បូង ហើយបត់ឆ្វេងឡើងទៅផ្លូវកម្ពុជាក្រោមទៅបុកគូទរថយន្តកាមរីគូទស្វិត បើកដោយបុរសម្នាក់ដែរ កំពុងធ្វើចរាចរណ៍បញ្ច្រាសទិសគ្នាពេញទំហឹងតែម្តង៕
ដោយ៖ ហេង នាង