មន្រ្តីការបរទេសអាមេរិកអនុញាត្តិឲ្យមន្ត្រីប្រឆាំងចូលជួប
ភ្នំពេញ (១១ មករា ២០១២)៖ លោក ដេន បៀរ (Dan Baer) ឧបការីរងរដ្ឋមន្ត្រីការបរទេសសហរដ្ឋអាមេរិកទួលបន្ទុកផ្នែកប្រជាធិបតេយ្យសិទ្ធិមនុស្ស និងការងារនៅថ្ងៃទី ១១ មករានេះ បានផ្ដល់ឱកាសដល់គណបក្សសមរង្ស៊ី និងបក្សសិទ្ធិមនុស្សឲ្យបង្ហាញពីគម្រោងរៀបចំចូលរួមបោះឆ្នោតនាពេលខាងមុខរបស់ខ្លួន។
លោក យឹម សុវណ្ណ អ្នកតំណាងរាស្ត្រ និងជាមន្ត្រីអ្នកនាំពាក្យគណបក្ស សម រង្ស៊ី បាននិយាយនៅក្រោយជំនួបនោះថា លោកបានលើកពីបញ្ហាប្រព័ន្ធយុត្តិធម៌នៅកម្ពុជា ដែលកំពុងស្ថិតនៅក្រោមសំពាធនយោបាយ បញ្ហាជម្លោះដីធ្លីដែលកំពុងកើតមានយ៉ាងអានាធិបតេយ្យ និងឈានទៅដល់ការបណ្ដេញប្រជាពលរដ្ឋចេញពីលំនៅឋាន បញ្ហាការកែទម្រង់ច្បាប់ប្រឆាំងអំពើពុករលួយ និងបញ្ហាការបោះឆ្នោត។
លោកបន្តថា គណបក្ស សម រង្ស៊ី សូមឲ្យសហរដ្ឋអាមេរិកជួយអន្តរាគមន៍លើករណីមន្រ្តីគណបក្សប្រជាជន បានប្រើប្រាស់ធនធានរបស់រដ្ឋក្នុងយុទ្ធនាការឃោសនាបោះឆ្នោតម្តងៗ និងការគំរាមកំហែងតាមរូបភាពនានា៖ «ដូច្នេះបើប្រព័ន្ធតុលាការមិន ឯករាជ្យ ចៅក្រម ព្រះរាជអាជ្ញាកាត់ក្ដីអយុត្តិធម៌ គ្មានសម្បជញ្ញៈ ហើយទទួលឥទ្ធិពលពីគណបក្សនយោបាយ គ្មានយុត្តិធម៌ទេសម្រាប់សង្គមកម្ពុជា»។
ថ្លែងបន្ទាប់ពីជំនួបនោះដែរ លោក កឹម សុខា ប្រធានគណបក្សសិទ្ធិមនុស្ស បាននិយាយថា គណបក្សរបស់លោកបានត្រៀមរៀបចំផែនការរួចអស់ហើយ ប៉ុន្តែលោកចង់ឃើញការបោះឆ្នោតនោះប្រព្រឹត្តទៅដោយសេរី និងយុត្តិធម៌ ហើយអ្វីដែលលោកព្រួយបារម្ភនោះ គឺប្រព័ន្ធបោះឆ្នោតមិនទាន់ឯករាជ្យ បញ្ហាប្រព័ន្ធផ្សព្វផ្សាយមិនស្មើភាពគ្នា។
មន្រ្តីគណបក្សប្រជាជនកម្ពុជាមួយរូបបាននិយាយថា ការនិយាយរបស់មន្រ្តីគណបក្សប្រឆាំងដោយបង្ហាញពីការរិះគន់របស់ខ្លួនមកលើគណបក្សប្រជាជន និងការចូលជួបរបស់ពួកគេជាមួយលោក ដេន បៀរ កាលពីព្រឹកនេះគឺបានបង្ហាញថា ប្រទេសកម្ពុជាមានប្រជាធិបតេយ្យហើយ៕
