ប្រជាជាតិ មហាអនុតំបន់ទន្លេមេគង្គជជែកគ្នាពីការទប់ស្កាត់ការជួញដូរមនុស្ស
ភ្នំពេញ (១១ មករា ២០១២): មន្ត្រីជាន់ខ្ពស់នៃក្រសួងយុត្តិធម៌របស់ប្រទេសកម្ពុជានៅថ្ងៃទី ១១ មករា នេះបានបង្ហាញពីរបៀបដែលទីភ្នាក់ងារយុត្តិធម៌ព្រហ្មទណ្ឌ និងទីភ្នាក់ងារជួយជនរងគ្រោះ ធ្វើការចូលរួមឲ្យមានប្រសិទ្ធភាព នៅក្នុងការឆ្លើយតបនឹងអំពើជួញដូរមនុស្សនៅក្នុងមហាអនុតំបន់ទន្លេមេគង្គ ៖ កម្ពុជា ឡាវ វៀតណាម ថៃ ភូមា និងចិនរួមមានកម្ពុជា ឡាវ វៀតណាម ថៃ ភូមា និងចិន។
ថ្លែងនៅឯសិក្ខាសាលាពង្រឹងកិច្ចសហប្រតិបត្តិការអន្តរជាតិលើការស៊ើបអង្កេត និងការផ្ដន្ទាទោសករណីជួញដូរមនុស្ស នៅក្នុងអនុតំបន់ទន្លេមេគង្គនៅឯសណ្ឋាគារកាំបូឌីយ៉ាណាដែលមានរយៈពេលពីរថ្ងៃគឺថ្ងៃទី១១-១៣ ខែមករា ឆ្នាំ២០១២ នេះ លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌បាននិយាយថា កន្លងមក មានអង្គការមិនមែនរដ្ឋាភិបាល និងទីភ្នាក់ងារអន្តរជាតិជាច្រើនបាននិងកំពុងបន្តការសហការផ្ដល់ការគាំទ្រដំណើរការនេះ។
លោកបន្តថា សកម្មភាពប្រយុទ្ធប្រឆាំងអំពើជួញដូរមនុស្ស ក្រោមដំណើរការខមមីត ត្រូវរៀបចំឡើង និងអនុវត្តតាមរយៈភាពជាដៃគូថ្មី រវាងរាជរដ្ឋាភិបាលមហាអនុតំបន់ទន្លេមេគង្គ និងដៃគូអភិវឌ្ឍន៍នានា។
លោក បញ្ជាក់ថា សិក្ខាសាលានាពេលនេះ គឺជាឧទាហរណ៍មួយក្នុងជំហានដែលកំពុងត្រូវបានអនុវត្ត ដើម្បីការកំណត់ការវិវត្តន៍ដែលបានធ្វើកន្លងមក ក្នុងកិច្ចសហប្រតិបត្តិការដើម្បីប្រឆាំងអំពើជួញដូរមនុស្ស និងកំណត់វិស័យដែលគួរពង្រឹងបន្ថែម៕
