ក្លិបអ្នកកាសែតកម្ពុជារៀបចំការប្រកួតប្រជែងរូបថតស្តីពី «សម្រស់សហគមន៍យើង»
សារព័ត៌មាន Cambodia News/
ភ្នំពេញ ៖ ការប្រកួតប្រជែងរូបថតស្តីពីសហគមន៍យើង អាចចាត់ទុកថា ជាការប្រកួតប្រជែងលើកដំបូង ហើយក៏ជាឱកាសសម្រាប់អ្នកសារព័ត៌មាន និងអ្នកថតរូបឯករាជ្យ ដែលធ្វើកិច្ចការពាក់ព័ន្ធជាមួយសារព័ត៌ មានក្នុងការបង្ហាញស្នាដៃថតរូបដ៏ល្អឯក ដើម្បីដណ្តើមពានរង្វាន់។
ក្រោយពីពិភាក្សាលើសកម្មភាពជាច្រើនរបស់ក្លិបអ្នកកាសែតកម្ពុជា (ក.អ.ក) និងដោយមានកិច្ចសហការគាំទ្រពីក្រុមហ៊ុន CP ALL (Cambodia) Co., Ltd. ក.អ.ក នឹងរៀបចំការប្រកួតប្រជែងរូបថតក្រោមប្រធានបទ «ផ្សព្វផ្សាយសម្រស់សហគមន៍យើង» ឬជាភាសាអង់គ្លេស «Promote the Beauty of Our Community» សម្រាប់អ្នកសារព័ត៌មាន ដែលកំពុងបំពេញការងារនៅតាមអង្គភាពទូរទស្សន៍ វិទ្យុ កាសែត បោះពុម្ភ សារព័ត៌មានអនឡាញ និងអ្នកសារព័ត៌មានឯករាជ្យ (Freelance Journalists) នៅកម្ពុជា។
គោលបំណងនៃការរៀបចំការប្រកួតប្រជែងរូបថតស្តីពី «សម្រស់សហគមន៍យើង» នេះឡើងគឺ ដើម្បីបំផុសចលនាប្រកួតប្រជែងស្នាដៃរូបថតល្អៗ និងលើកទឹកចិត្តអ្នកសារព័ត៌មានរួមទាំងផ្តល់ ឱកាសដល់អ្នកសារព័ត៌មាន ក៏ដូចជាអ្នកថតរូបឯករាជ្យ ដែលធ្វើកិច្ចការពាក់ព័ន្ធជាមួយសារព័ត៌មានក្នុងការចូលរួមដណ្តើមពានរង្វាន់ឆ្នើមសម្រាប់ឆ្នាំ២០២៣ និងផ្សព្វផ្សាយអំពីសម្រស់ និងបរិស្ថានល្អៗរបស់សហគមន៍។
លក្ខខណ្ឌនៃការចូលរួម
រូបថតដែលអាចដាក់បញ្ចូលក្នុងការប្រកួតប្រជែងត្រូវស្ថិតក្នុងលក្ខខណ្ឌដូចខាងក្រោម៖
១/ ជាស្នាដៃផ្ទាល់របស់អ្នកចូលរួមប្រកួត។
២/ ជារូបថតដែលមិនមានការរៀបចំដើម្បីថត ឬកែ (Edit) ។
៣/ ជារូបថតដែលបង្ហាញពីសម្រស់ធនធានធម្មជាតិ តំបន់រមណីយដ្ឋានទេសចរណ៍ អេកូទេសចរណ៍ ឬបង្ហាញពីបរិស្ថានស្អាត និងការអភិវឌ្ឍ។
៤/ ជារូបថតដែលបានបង្ហាញនូវភាពទាក់ទាញ និងមានអត្ថន័យទាក់ទងនឹងប្រធានបទ។
៥/ ជារូបថតដែលត្រូវបានចុះផ្សាយក្នុងអង្គភាពរបស់ខ្លួន ឬអង្គភាពសារព័ត៌មានណាមួយចាប់ពីថ្ងៃទី០១ ខែមករា ឆ្នាំ២០២២ ដល់ថ្ងៃទី៣០ ខែសីហា ឆ្នាំ២០២៣។
ពានរង្វាន់
១- ជ័យលាភីលេខ១ នឹងទទួលបានថវិកាចំនួន ៣លានរៀល និងពាន១
២- ជ័យលាភីលេខ២ នឹងទទួលបានថវិកាចំនួន ២លាន ៥សែនរៀល និងពាន១
៣- ជ័យលាភីលេខ៣ នឹងទទួលបានថវិកាចំនួន ២លានរៀល និងពាន១
៤- ជ័យលាភីលេខ៤ នឹងទទួលបានថវិកាចំនួន ១លាន ៥សែនរៀល និងពាន១
៥- ជ័យលាភីលេខ៥ នឹងទទួលបានថវិកាចំនួន ១លានរៀល និងពាន១
បេក្ខជនត្រូវផ្ញើរូបថត ដែលត្រូវចូលរួមប្រកួតជាសន្លឹក ឬជា Files ចំនួន៣សន្លឹកដោយភ្ជាប់សំណៅដើម ដែលបានបង្ហាញថា រូបថតនេះត្រូវបានចុះផ្សាយរួចហើយក្នុងអង្គភាពសារព័ត៌មានណាមួយមកកាន់ក្លិបអ្នកកាសែតកម្ពុជា ដែលមានអាសយដ្ឋានផ្ទះលេខ១២ ផ្លូវលេខ៥ (បុរីប៉េងហួតមុខផ្សារប៉េសេ ផ្លូវ៣៧១) សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ឲ្យបានមុន ថ្ងៃទី៣០ ខែសីហា ឆ្នាំ២០២៣។
បញ្ជាក់ ៖ សម្រាប់ព័ត៌មានបន្ថែមទាក់ទងការប្រកួតនេះ សូមទំនាក់ទំនងតាមរយៈទូរស័ព្ទ ឬតេឡេក្រាមលេខ៖ ០១២ ៨៩៥ ៨៥៣, ០១៧ ៣៩៧ ២៩៤, ០៧៧ ៤៨០ ១៧១៕
