សម្តេចតេជោ ៖ ក្រោយចាញ់បោក ខឹម វាសនា មនុស្សមួយចំនួន អាចនឹងអត់មានកន្លែងនៅ
សារព័ត៌មាន Cambodia News/
ភ្នំពេញ ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានលើកឡើងថា មនុស្សមួយចំនួនដែលមករកលោក ខឹម វាសនានៅលើភ្នំគូលែន ពេលត្រឡប់ទៅស្រុកកំណើតវិញ នឹងអាចអត់មានកន្លែងរស់នៅ ដោយសារផ្ទះសម្បែង ដីធ្លី លក់ខ្ទេចខ្ទី ដើម្បីយកលុយមករកខឹម វាសនា ។
សម្តេចតេជោ ហ៊ុន សែន បានថ្លែងបែបនេះក្នុងឱកាសអញ្ជើញជាអធិបតីបើកការដ្ឋានសាងសង់ស្ពានអាកាសក្នុងរាជធានីភ្នំពេញចំនួន០២បន្ថែមទៀតនៅថ្ងៃទី៣១ ខែសីហា ឆ្នាំ២០២២នេះ។
សម្តេចបន្តថា ក្នុងនោះ គ្រួសារខ្លះ មានការខ្វែងគំនិតគ្នា ឈានដល់ការបែកបាក់គ្រួសារ បន្ទាប់ពីចាញ់បោកខឹម វាសនា ។ ចំណុចនេះ សម្តេចបានអំពាវនាវ ឲ្យរួមរស់នៅជាមួយគ្នា ដូចដើមវិញទៅ ហើយអ្នកភូមិ និងអាជ្ញាធរមូលដ្ឋាន ក៏កុំរើសអើង អ្នកមករក ខឹម វាសនា ដែរ។
ជាមួយគ្នានេះ សម្តេចតេជោ ហ៊ុន សែន ក៏បានប្រកាសដាក់ចេញវិធានការដាច់ណាត់ ចំពោះការប្រមូលផ្តុំនៅចំការរបស់លោក ខឹម វាសនា នៅតំបន់ភ្នំគូលែនដោយ ៖
ទី១- ប្រុងប្រយ័ត្នការជ្រៀតចូល នៃក្រុមបាតដៃទី៣ បង្កហេតុនៅកន្លែង ប្រមូលផ្តុំដោយគ្មានច្បាប់ទម្លាប់ទាំងនោះ។
ទី២- ហាមទៅចាប់យកដីស្នាក់នៅតំបន់រុនតាឯក ដែលរាជរដ្ឋាភិបាល កំពុងផ្តល់ជូនប្រជាពលរដ្ឋដែលចាកចេញពីតំបន់អង្គរ៕
