ភ្នាក់ងារស៊ើបការណ៍សម្ងាត់អាមេរិក ៖ លោក វ្ល៉ាឌីមៀ ពូទីន នឹងមិនបញ្ចប់សង្រ្គាមនៅត្រឹមអ៊ុយក្រែននោះទេ
សារព័ត៌មាន Cambodia News/
ថ្ងៃចេញផ្សាយៈ May 12, 2022/
វ៉ាស៊ីនតោន ៖ នាយកទីភ្នាក់ងារស៊ើបការណ៍សម្ងាត់ជាតិអាមេរិក លោកស្រី អាវ្រីល ហេននែស កាលពីថ្ងៃអង្គារបានព្រមានថា ប្រធានាធិបតីរុស្ស៉ីលោក វ្ល៉ាឌីមៀ ពូទីន នឹងមិនបញ្ចប់សង្រ្គាមអ៊ុយក្រែន នៅត្រឹមតំបន់ដុនបាស់នោះទេ គឺអាចនឹងសាងផ្លូវស្ពានមួយភ្ជាប់ទៅកាន់តំបន់ ត្រេនស្នីស្រ្ទីយ៉ា គ្រប់គ្រងដោយរុស្ស៉ីនៅម៉ុលដាវី។
លោកស្រី ហេននែស បន្ថែមថា ទីភ្នាក់ងារស៊ើបការណ៍អាមេរិកក៏កំពុងតាមដានផងដែរ អំពីលទ្ធភាពអាចទៅរួចដែលថា លោក ពូទីន អាចនឹងកែនកងទ័ពបន្ថែមនៅទូទាំងប្រទេសរុស្ស៉ី ក្នុងនោះរួមមានទាំងការដាក់ចេញច្បាប់អាជ្ញាសឹក និងការវាយកាត់ផ្ដាច់ការផ្ដល់ជំនួយរបស់លោកខាងលិចដល់អ៊ុយក្រែន។
ប្រមុខចារកម្មអាមេរិករូបនេះបានសង្កត់ធ្ងន់ថា ការសម្រេចចិត្តរបស់លោក ពូទីន ក្នុងការដកកងទ័ពចេញពីការវាយកាន់កាប់ទីក្រុងកៀវ ហើយបញ្ជូនទៅកាន់តំបន់ដុនបាស់នាពេលកន្លងមក គឺជារឿងបណ្ដោះអាសន្នប៉ុណ្ណោះ ដោយកងទ័ពរុស្ស៉ីនៅតែចិញ្ចឹមចិត្តចង់គ្រប់គ្រងដែនដីទាំងអស់ ក្នុងតំបន់ឆ្នេរសមុទ្រខ្មៅ ដើម្បីធានាប្រភពធនធានទឹកសម្រាប់តំបន់គ្រីមៀ ដែលទីក្រុងម៉ូស្គូ ក្រសោបយកពីអ៊ុយក្រែនកាលពីឆ្នាំ២០១៤៕