សម្តេចតេជោ បានចេញបទបញ្ជាចំនួន៦ចំណុចអំពីការផ្ទុះឡើង នៃការឆ្លងរាលដាលនៃកូវីដ១៩ជាសហគមន៍ជាថ្មីទៀត
សារព័ត៌មាន Cambodia News/
ភ្នំពេញ (២០ កុម្ភៈ ២០២១) ៖សម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃព្រះរាជានាចក្រកម្ពុជាបានចេញបទបញ្ជានិងអំពាវនាវទៅកាន់រួមជាតិអំពីការផ្ទុះឡើង នៃការឆ្លងរាលដាលនៃកូវីដ១៩ជាសហគមន៍ថ្មីទៀតដែលបានកើតឡើងកាលពីថ្ងៃទី ១៩ខែកុម្ភៈដែលបានបង្កឲ្យមនុស្សចំនួន៣២នាក់បានឆ្លងកូវីដ១៩តែក្នុងរយៈពេល ប្រមាណជាង ១០ម៉ោងតែប៉ុណ្ណោះ ។
សម្តេចតេជោ ហ៊ុន សែន បានចេញបទបញ្ជា និងអំពាវនាវឱ្យពលរដ្ឋខ្មែរចំនួន៦ចំណុចដូចតទៅ៖
១-សម្តេចតេជោស្នើសុំការយោគយល់ពីអ្នកធុរកិច្ច និងការស្នាក់ការនៅរបស់ពលរដ្ឋ ដែលតម្រូវឱ្យមានការបិទអគារ ក្លឹបកម្សាន្តN8 និងតំបន់មួយចំនួនដែលផ្ទុះករណីកូវីដ១៩ ជាចាំបាច់ ដោយមិនអនុញ្ញាតអោយចេញ-ចូល លើកលែងតែអ្នកដែលជាម្ចាស់ផ្ទះក្នុងតំបន់នោះ គឺអោយចូល តែមិនអនុញ្ញាតអោយចេញ ។
២- បន្តយកសំណាកធ្វើតេស្តសម្រាប់អ្នកនៅក្នុងតំបន់មានផ្ទុះកូវីដ១៩ ហើយបន្ទាប់ពីធ្វើតេស្តហើយត្រូវធ្វើចត្តាឡីស័ក ១៤ថ្ងៃ ដែលចំនួននៃការធ្វើតេស្តអាចនឹងមានចំនួនច្រើន។
៣- អាជ្ញាធរត្រូវបន្តស្វែងរកអ្នកពាក់ព័ន្ធនឹងក្លឹប N8 ទោះទៅដល់ទីណាក៏ដោយ ដើម្បីស្វែងរកមកធ្វើតេស្ត នឹងការធ្វើចត្តាឡីស័កឲ្យបានត្រឹមត្រូវ។
៤- ត្រូវធ្វើចត្តាឡីស័កសម្រាប់អ្នកដែលមានការពាក់ព័ន្ធទាំងអស់ និងត្រូវយកសំណាករបស់ពួកគាត់មកធ្វើតេស្តផងដែរ ៥- សម្តេចតេជោ ហ៊ុន សែន បានអំពាវនាវដល់អ្នកពាក់ព័ន្ធនឹងក្លឹប N8 ទាំងអស់ និងពាក់ព័ន្ធនឹងអ្នកមានជំងឺកូវីដ១៩ ទាំង៣២នាក់នេះ ម្ចាស់ការមកឱ្យពិនិត្យសំណាកជាចាំបាច់បំផុត។
៦- សម្តេចតេជោ ហ៊ុន សែន អំពាវនាវដល់ពលរដ្ឋនៅភ្នំពេញ និងតំបន់ដទៃទៀត ត្រូវបង្កើនការប្រុងប្រយ័ត្ន ហើយរឹតបន្តឹងក្នុងការអនុវត្តវិធានការ៣ការពារ និង៣កុំ ឲ្យបានជាប់លាប់ល្អតាមការណែនាំរបស់ក្រសួងសុខាភិបាល។
សម្តេចបានបញ្ជាក់ថា អ្នកដែលឆ្លងកុវីដ១៩នេះគឺជាជនជាតិចិនដែលប្រភពត្រូវបានដឹងថាឆ្លងចេញពីអ្នកដែលទៅកំសាន្តនៅក្លឹប N8 ដែលមានទីតាំងនៅ ក្នុងសង្កាត់ទួលស្វាយព្រៃទី២ ខណ្ឌបឹងកេងកងរាជធានីភ្នំពេញ ។សម្តេចតេជោ ហ៊ុន សែន បានហៅការឆ្លងនេះថាជាព្រឹត្តិការណ៍សហគមន៍«២០កុម្ភៈ»ដោយសម្តេចចាត់ ទុកជាស្ថានភាពដ៏អាក្រក់សម្រាប់កម្ពុជាក្នុងពេលដែលកម្ពុជាកំពុងតែធ្វើការប្រយុទ្ធប្រឆាំងជាមួយនឹងកូវីដ១៩ ដែលនាំចូលពីប្រទេសថៃនិងការរីករាលដាលពីវៀតណាម ។
តែទោះបីយ៉ាងណាសម្តេចសង្ឃឹមថាព្រឹត្តិការណ៍២០កុម្ភៈ អាចនឹងត្រូវបិទបញ្ចប់បានក្នុងរយៈពេលមិនលើសពីមួយខែទេព្រោះអាជ្ញាធរបានគ្រប់គ្រងសភាពការណ៍បានទាន់ ពេលវេលា៕
