ព្យុះ និងទឹកជំនន់ផ្ដាច់ជីវិតប្រជាជនវៀតណាមកើនដល់២៣នាក់ និងច្រើននាក់កំពុងបាត់ខ្លួន
សារព័ត៌មាន Cambodia News/
វៀតណាម ៖ អាជ្ញាធរវៀតណាមបាននិយាយកាលពីថ្ងៃច័ន្ទថា យ៉ាងហោចណាស់មនុស្សចំនួន២៣នាក់បានស្លាប់ និងជាច្រើននាក់កំពុងបាត់ខ្លួនបន្ទាប់ពីទឹកជំនន់បានជន់លិចផ្ទះជាច្រើននៅភាគកណ្តាលប្រទេសវៀតណាម។ នេះបើយោងតាមប្រភពពីសារព័ត៌មាន CNA។
រូបភាពនៅលើប្រព័ន្ធផ្សព្វផ្សាយបានបង្ហាញពីភូមិទាំងមូលនៅក្រោមទឹកក្នុងខេត្ត Quang Tri និង ខេត្ត Quang Nam ខណៈទឹកជំនន់បានបោកបក់ពេញតំបន់ Imperial City នៃទីក្រុង Hue និងកន្លែងទេសចរណ៍ Hoi An ផងដែរកាលពីចុងសប្តាហ៍។
កងកម្លាងយោធាបានធ្វើការជួយសង្គ្រោះតាមឧទ្ធម្ភាគចក្រដល់អ្នកនេសាទ ៨ នាក់ដែលត្រូវបានទឹកហូរយកទៅបាត់នៅសមុទ្រក្នុងខេត្ត Quang Tri។ ក្នុងចំណោមអ្នកនេសាទ៨នាក់ មាន៣នាក់ស្លាប់និង៣នាក់ទៀតកំពុងបាត់ខ្លួន។
ប្រទេសវៀតណាមតែងតែទទួលរងប៉ះពាល់ជាញឹកញាប់ដោយអាកាសធាតុដ៏អាក្រក់នៅរដូវវស្សាចន្លោះខែមិថុនា និងវិច្ឆិកា ជាពិសេសតំបន់ឆ្នេរកណ្តាលងាយរងគ្រោះបំផុត។ ប្រទេសនេះកំពុងទទួលរងព្យុះមួយទៀតដែលកើតចេញពីសមុទ្រចិនខាងត្បូង និងមានភ្លៀងធ្លាក់ខ្លាំងម្តងទៀត។
ទីភ្នាក់ងារអាកាសធាតុជាតិបាននិយាយកាលពីថ្ងៃចន្ទថា ព្យុះ Nangka ដែលត្រូវបានគេព្យាករណ៍ថានឹងធ្វើឱ្យមានការបាក់ដីនៅភាគខាងជើងប្រទេសវៀតណាមនៅថ្ងៃពុធនឹងបង្កឱ្យមានភ្លៀងធ្លាក់ខ្លាំងនៅផ្នែកខ្លះនៃភាគខាងជើង និងភាគកណ្តាលប្រទេសវៀតណាមចាប់ពីថ្ងៃពុធដល់ថ្ងៃសុក្រ។
យោងតាមការិយាល័យស្ថិតិទូទៅពីអាជ្ញាធរវៀតណាមបានឲ្យដឹងថា មនុស្សប្រមាណ១៣២នាក់ត្រូវបានរាយការណ៍ថា បានស្លាប់ ឬបាត់ខ្លួនដោយសារគ្រោះមហន្តរាយធម្មជាតិនៅប្រទេសវៀតណាមកាលពីឆ្នាំមុន៕
