សម្តេចតេជោ ប្រកាសបន្តផ្តល់ប្រាក់ឧបត្ថម្ភដល់អ្នកងាយរងគ្រោះដោយសារកូវីដ១៩ រយៈពេល៣ខែទៀត
សារព័ត៌មាន Cambodia News/
ខេត្តកណ្តាល (៧ តុលា ២០២០) ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសបន្តផ្តល់ប្រាក់ឧបត្ថម្ភ រយៈពេល ៣ខែបន្ថែមទៀត ដល់គ្រួសារ និងអ្នកងាយរងគ្រោះ ក្នុងអំឡុងពេល កូវីដ១៩។
សម្តេចតេជោ ហ៊ុន សែន បានប្រកាសដូច្នេះ ក្នុងពេលសម្តេច អញ្ជើញសម្ពោធមជ្ឈមណ្ឌលកម្សាន្ត «ព្រីនស៍ ម៉ាណ័រ» នៅស្រុកកៀនស្វាយ ខេត្តកណ្តាល នាព្រឹកថ្ងៃទី០៧ ខែតុលា ឆ្នាំ២០២០។
សម្តេចបញ្ជាក់ថា ក្រុមគ្រួសារ និងអ្នកងាយរងគ្រោះ ដោយសារជំងឺកូវីដ១៩ ដែលទទួលបានប្រាក់ឧបត្ថម្ភពីរាជរដ្ឋាភិបាល ចាប់តាំងពីខែមិថុនា មកដល់ខែតុលានេះ មានចំនួន ៦០ម៉ឺនគ្រួសារ ប្រមាណជាង ៣លាននាក់។
ក្រៅពីនោះ សម្តេចតេជោ ហ៊ុន សែន ក៏បានប្រកាសបន្តគ្រប់វិធានការឧបត្ថម្ភរបស់រាជរដ្ឋាភិបាលត្រូវបន្តរយៈពេល៣ខែទៀត ដូចជា ការឧបត្ថម្ភធនបន្ថយ និងលើកលែងពន្ធដល់ក្រុមហ៊ុន រោងចក្រសហគ្រាស ដែលរងផលប៉ះពាល់ដោយ ជំងឺកូវីដ១៩ ក៏ដូចជាការឧបត្ថម្ភដល់ បុគ្គលិកកម្មករ និយោជិត ក្នុងវិស័យកាត់ដេរ និងទេសចរណ៍ ព្រមទាំងការបន្តបើកប្រាក់ឧបត្ថម្ភដល់កម្មករនិយោជិត ដែលសម្រាលកូន ជាដើម។
សូមជម្រាបថា គិតត្រឹមម៉ោង៧ព្រឹកថ្ងៃទី០៧ ខែតុលា ឆ្នាំ២០២០នេះ កម្ពុជាបានរកឃើញអ្នកឆ្លងកូវីដ១៩ ទាំងអស់ចំនួន២៨០នាក់ ក្នុងនោះអ្នកព្យាបាលជាសះស្បើយចំនួន២៧៦នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន៤នាក់៕
