សម្តេចតេជោ មិនយល់ចំពោះអ្នកវិភាគថា កម្ពុជាគួរតែមានច្បាប់ឲ្យមានទាយាទនាយករដ្ឋមន្ត្រី
សារព័ត៌មាន Cambodia News/
ភ្នំពេញ (២ មីនា ២០២០) ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានថ្លែងថា សម្តេចមិនយល់ចំពោះអ្នកវិភាគមួយចំនួនដែលលើកឡើងនូវយោបល់មួយដែលថា កម្ពុជាគួរតែមានច្បាប់ឲ្យមានទាយាទសម្រាប់តំណែងនាយករដ្ឋមន្ត្រី។
សម្តេចថ្លែងបែបនេះនាព្រឹកថ្ងៃចន្ទ ៩កើត ខែផល្គុន ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី០២ ខែមីនា ឆ្នាំ២០២០នេះ ក្នុងឱកាសអញ្ជើញប្រគល់សញ្ញាបត្រជូននិស្សិតសាកលវិទ្យាល័យអាស៊ីអឺរ៉ុប១,៥៨៩នាក់ នៅវិទ្យាស្ថានជាតិអប់រំ។
សម្តេចបានលើកឡើងថា សម្តេចមិនយល់ទាល់តែសោះចំពោះគំនិតរបស់អ្នកវិភាគ មួយចំនួនដែលលើកឡើងអំពីគោលបំណងឲ្យមានទាយាទសម្រាប់តំណែងនាយករដ្ឋមន្ត្រី ព្រោះថា ការធ្វើបែបនោះវាផ្ទុយពីលទ្ធិប្រជាធិបតេយ្យ ហើយផ្ទុយពីរដ្ឋធម្មនុញ្ញ ។
ទន្ទឹមនោះសម្តេច ហ៊ុន សែន ក៏បានហៅអ្នកវិភាគដែលបានលើកឡើងនូវយោបល់ខាងលើនេះថា ជា « មនុស្សឆ្កួត » ព្រោះថា គេមិនដែលយករឿងបុគ្គលទៅដាក់ក្នុងរដ្ឋធម្មនុញ្ញនោះទេ៕
