មូលហេតុមួយចំនួនដែលធ្វើឲ្យកូនក្មេងងាយកើតអំបៅអំបែក
សារព័ត៌មាន Cambodia News/
សុខភាព (១៥ សីហា ២០១៩) ៖ អំបៅអំបែក កើតឡើងដោយសារមេរោគ និងបាក់តេរី ចូលទៅក្នុងក្រដាសត្រចៀកធ្វើឲ្យរលាកក្រដាសត្រចៀក ហើយយូរៗទៅបង្កជាខ្ទុះ ធ្លាយចេញពីត្រចៀកកណ្តាលមកក្រៅ។ មានមូលហេតុជាច្រើនដែលក្មេងឧស្សាហ៍កើតជំងឺអំបៅអំបែក នេះបើតាមការបញ្ជាក់របស់លោកវេជ្ជបណ្ឌិត ហម សីលា ឯកទេសត្រចៀក ច្រមុះ បំពង់ក នៃមន្ទីរពេទ្យព្រះអង្គឌួង។
១- ត្បារត្រចៀក
មិនថាកូនក្មេង ឬមនុស្សចាស់នោះទេ ដាច់ខាតមិនត្រូវត្បារត្រចៀកនោះទេ កាលណាយើងយករបស់អ្វីមួយទៅត្បារត្រចៀក គឺដូចយកមេរោគទៅចូលក្នុងត្រចៀកកណ្តាល។ អ្វីដែលគ្រោះថ្នាក់ គឺការយករបស់រឹងទៅត្បារត្រចៀកដូចជា រោមស្លាបមាន់ ឈើស្រួច ឬក៏ដែករឹង អាចធ្វើឲ្យដាច់រហែកក្រដាសត្រចៀក រលាកត្រចៀក កើតអំបៅអំបែក និងប៉ះពាល់ដល់ការស្តាប់ឮ ឬថ្លង់។
២- បំបៅកូនឈ្លក់
ពេលបំបៅដោះម៉ាក់ៗត្រូវប្រយ័ត្នបន្តិច បើកូនឧស្សាហ៍ឈ្លក់ ឬហៀរទឹកដោះ ឬទឹកដោះគោចូលត្រចៀកកូននោះ ត្រូវជូតសម្អាតចេញភ្លាម បើមិនអ៊ីចឹងទេទៅជាបង្ករោគក្នុងត្រចៀក កើតជំងឺអំបៅអំបែក។
៣- ទឹកចូលត្រចៀក
ក្មេងៗដែលចូលចិត្តហែលទឹកងាយនឹងកើតបំបៅអំបែក ម្យ៉ាងទៀតការងូតទឹកឲ្យកូនក៏ដូចគ្នា បើមិនប្រយ័ត្នទឹកចូលត្រចៀក។ ពេលទឹកចូលដំបូងធ្វើឲ្យរលាកលើក្រដាសត្រចៀក បើយើងព្រមព្យាបាលត្រឹមត្រូវ បន្តទុកយូរទៅជាធ្លាយក្រដាសត្រចៀក បង្កទៅជាខ្ទុះធ្លាយពីត្រចៀកផ្នែកកណ្តាលចេញមកក្រៅ។
៤- កើតជំងឺផ្តាសាយញឹកញាប់
ក្មេងដែលកើតជំងឺផ្តាសាយញឹកញាប់ងាយកើតជំងឺអំបៅអំបែកដែរ ដោយសារមេរោគឆ្លងតាមរយៈរន្ធមួយពីបំពង់កទៅត្រចៀក ទៅជារលាកត្រចៀកកើតអំបៅអំបែក។
បើកូនកើតជំងឺអំបៅអំបែក ម៉ាក់ប៉ាប្រញាប់នាំទៅជួបគ្រូពេទ្យ កាលបណ្តោយឲ្យហូរខ្ទុះមិនឈប់ រយៈពេលយូរ ថែមទាំងមានក្លិនស្អុយទៀតនោះអាចរាលដាលដល់ខួរក្បាល៕
