សម្តេចតេជោ អរគុណជនរួមជាតិខ្មែរ ដែលមានស្មារតីសាមគ្គីឯកភាពជាតិ
សារព័ត៌មាន Cambodia News/
ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបង្ហាញនូវក្តីសោមនស្សរីក រាយយ៉ាងក្រៃលែង ដែលបានឃើញជនរួមជាតិខ្មែរទាំងក្នុង និងក្រៅប្រទេស មានស្មារតីសាមគ្គី ឯកភាព ជាតិជាធ្លុងមួយយ៉ាងរឹងមាំ តាមរយៈការទទួលទាននំបញ្ចុក នៅថ្ងៃទី០៩ ខែមិថុនា ម្សិលមិញនេះ។
តាមរយៈទំព័របណ្ដាញសង្គមហ្វេសប៊ុក នៅព្រឹកថ្ងៃទី១០ ខែមិថុនានេះ សម្ដេចបានផ្ញើសារថ្លែង អំណរគុណដល់ជនរួមជាតិខ្មែរ នៅក្នុងប្រទេស និងក្រៅប្រទេស ដែលបានចូលរួមហូបនំបញ្ចុក ជាមួយ ក្រុមគ្រួសារ និងសហគមន៍ខ្មែរ នៅតាមបណ្តារដ្ឋ និងតាមទីក្រុងនានា ដើម្បីបង្ហាញពីសាមគ្គីភាព មិត្តភាព និងការស្រឡាញ់រាប់អានរវាងខ្មែរ ទោះបីបានទៅរស់នៅឯបរទេសហើយក្តី។
សម្ដេចតេជោ បានបញ្ជាក់ថា ទិវាហូបនំបញ្ចុកនេះ នឹងត្រូវបានគេចង់ចាំ ដើម្បីពង្រឹងស្មារតីសាមគ្គី ភាព រួបរួមឯកភាពជាតិ និងការស្រឡាញ់ជាតិមាតុប្រទេស នៅក្រោមម្លប់សន្តិភាព ដែលរកបានមកដោយ លំបាកបំផុត។
កាលពីម្សិលមិញ នៅក្នុងក្របខណ្ឌទូទាំងប្រទេស ប្រជាពលរដ្ឋខ្មែរគ្រប់ជាន់ថ្នាក់ បានចូលរួមរៀប ចំហូបនំបញ្ចុកដោយក្ដីសប្បាយរីករាយជាមួយគ្នា តាមការអំពាវនាវរបស់សម្តេចតេជោ ដើម្បីពង្រឹងសាមគ្គី ជាតិ ឯកភាពជាតិ ដែលមិនមានការលាបពណ៌ ធ្វើឱ្យសង្គមជាតិមានការបែកបាក់នោះឡើយ៕
